Qazaqstandyqtarǵa poıyz bıletin onlaın satyp alý usynyldy

NUR-SULTAN. QazAqparat - 1 maýsymnan bastap vokzal ǵımaratyna jol júrý bıleti bar jolaýshylar ǵana kirgiziledi. «Qazaqstan temir joly» kompanııasy jańa qaýipsizdik talaptaryn jarııalady, dep habarlaıdy QazAqparat tilshisi.

«Bas sanıtar dáriger sheshimimen 1 maýsymnan bastap vokzal ǵımaratyna jol júrý bıleti bar jolaýshylar ǵana kirgiziledi. Munda vokzaldar ákimshiligi jolaýshylarǵa bıletti onlaın túrde satyp alýǵa keńes beredi. QTJ saıty men 14 ınternet resýrstan, qyzmet kórsetý termınaldarynan bılet alýǵa bolady», - deıdi «QTJ» UK» AQ Vokzal sharýashylyǵyn damytý jáne paıdalaný boıynsha atqarýshy dırektory Juban Kórpebaev tilshilerge bergen suhbatynda.

Ázirge bas sanıtar dáriger sheshimimen shyǵaryp salýshylarǵa vokzalǵa kirýge tyıym salyndy. Bul másele epıdemııalyq jaǵdaıǵa baılanysty bolady.

Eske sala ketsek, 1 maýsymnan bastap, jolaýshylar poıyzynyń jumysy kezeń-kezeńimen jandanady.

15 mamyrda bılet satylymy bastalyp, 23 myńnan astam bılet satyldy.