Qazaqstandyqtarǵa ınvestıtsııa quıyp, tabys tabýdyń joldary túsindirile bastady

ASTANA. QazAqparat – Elimizde ınvestıtsııa quıý arqyly tabys tabý jolyn úıretetin aqparattyq túsindirý sharasy qolǵa alyndy, dep habarlaıdy QazAqparat tilshisi.

«Búgingi sharanyń maqsaty – halyqtyń qarjylyq saýattylyǵyn arttyrý. Qarapaıym halyq qarjy salasyna qatysty keıbir jaıttardy keńinen túsinbeı jatady. Tájirıbe kórsetkendeı halyq jeke jınaǵyn dollarmen saqtaıdy, sondaı-aq depozıtke salady nemese jyljymaıtyn múlik satyp alady. Qazir ınvestıtsııa quıý men tartýdyń túrli joly bar. Odan qaldy, baǵaly qaǵazdar men oblıgatsııaǵa ınvestıtsııa quıý arqyly da tabysqa kenelýge bolady», - dedi «Samuryq-Qazyna» qorynyń damý jáne jekeshelendirý boıynsha basqarýshy dırektory Ernar Janádil elordada ótip jatqan halyqaralyq ınvestorlar aptalyǵynyń sessııasynda.

Onyń aıtýynsha, ýaqyt óte kele ınvestıtsııanyń jańa túrleri paıda bolyp jatyr.

«Qazir tsıfrlandyrý, tehnologııa zamany. Atalǵan salalarǵa ınvestıtsııa quıǵysy keletinder kóp. Taǵy bir mysal, Nike kompanııasy shekti kólemde krossovka shyǵardy. Sol krossovkalar serııasynyń shyǵarylymyna ınvestıtsııa quıǵan qarapaıym adamdar bar. Solaı tabys tabady nemese atalǵan markaly krossovkalardy satý quqyǵyna ıe bolady. Árıne, biz áli ondaı jaǵdaıǵa jetken joqpyz, erteleý. Osy oraıda «Samuryq-Qazyna» qory qarjy jáne bırja uıymdary mamandarymen birlesip halyq arasynda ınvestıtsııa quıý, ol arqyly tabys tabý týraly aqparattyq túsindirý jumysyn júrgizýdi qolǵa aldy», - deıdi ol.

Buǵan deıin «Samuryq-Qazyna» qorynyń ókili 250-den astam kompanııa jekeshelendirýge jatatynyn aıtqan edi.