Qazaqstandyqtarǵa AQSh vızasy jıi berile bastady

ASTANA. QazAqparat - Qazaqstan azamattaryna AQSh tarapynan beriletin vızalardyń sany artyp kele jatyr. Bul jaıly búgin QR SІM vıtse-mınıstri Erjan Ashyqbaevpen kezdesken Ońtústik jáne Ortalyq Azııa boıynsha AQSh memlekettik departametiniń joǵary laýazymdy ókili Elıs Ýells aıtty, dep habarlaıdy «QazAqparat» HAA tilshisi.

«Búgingi otyrys barysynda konsýldyq máselelerdi qaýzadyq. Bizdiń sarapshylar bul baǵyttaǵy jumysty tústen keıin de talqylaıtyn bolady. Qazaqstan azamattaryna beriletin vızalar sanynyń artyp kele jatqanyna qýanyshymdy bildiremin. Biz qazirgi ýaqytta bıznestik jáne týrıstik maqsattarǵa baılanysty 10 jyldyq vıza berýdi jolǵa qoıdyq. Qazaqstandyq áriptesterimizdiń bul jumysqa kózqarasyn bilgimiz keledi. Biz vızalyq tártip pen konsýldyq jumystar bizdiń seriktestigimiz aıasynda tıimdi jumys istegenin qalaımyz», - deıdi Elıs Ýells.

Óz kezeginde QR SІM vıtse-mınıstri Erjan Ashyqbaev konsýldyq saladaǵy eki el arasyndaǵy ózara árekettestikti úlgi tutarlyq dep atady. Ol qazaqstandyqtarǵa Amerıkaǵa barý úshin beriletin vızalardyń sanyna, 10 nemese 5 jyldyq vızalardyń berilý sharalaryna joǵary baǵa berdi.

Eske sala ketsek, búgin QR SІM basshysynyń orynbasary Erjan Ashyqbaev pen Ońtústik jáne Ortalyq Azııa boıynsha AQSh memlekettik departametiniń joǵary laýazymdy ókili Elıs Ýells kezdesý ótkizip, eki eldiń arasyndaǵy qarym-qatynastardy, Aýǵanstan men Koreıadaǵy shıelenisti retteý, sonymen birge DAISh-tyń (Qazaqstanda jáne ózge elder aýmaǵynda tyıym salynǵan) birjolata jeńilgenine kóz jetkizý máselelerin talqylaǵan bolatyn.