Qazaqstandyqtardyń jeke málimetteriniń urlanýyna jol berilmedi

NUR-SULTAN. QazAqparat - «KZ-CERT» RMK kompıýterlik ıntsıdentterge áreket etý qyzmeti jáne NitroTeam JShS arasyndaǵy memorandým aıasynda birlesken sharalardyń arqasynda medıtsınalyq kompanııa portalynda server konfıgýratsııasyna qatysty aqaý tabylyp, joıyldy, dep habarlaıdy QazAqparat «KZ-CERT» baspasóz qyzmetine silteme jasap.

«Osy aqaýdyń kesirinen kompanııa portalynda tirkelgen emdelýshiniń logıny men qupııa sózi kez kelgen ınternet qoldanýshyǵa qoljetimdi bolǵan. Al júıege qosyla alǵandar emdelýshiniń aty-jóni, telefon nómiri men email-adresi, sonymen qatar, medıtsınalyq taldaý qorytyndylaryna qol jetkizgen. Bul jaǵdaı tikeleı aqparattyq qaýipsizdik saıasatyna qaıshy» delingen habarlamada.

Aqaý bolǵan zerthananyń tanymaldyǵyn eskeresek, aqparattyń taralý aýqymyn elestetý qıyn. Qalaı bolǵanda da, ortaq jáne shuǵyl júrgizilgen jumystyń nátıjesinde jeke aqparattyń jáne zerthanalyq zertteýlerdiń áshkerelenýine jol berilmedi.