Qazaqstandyqtardyń jedel járdem qyzmetine shaǵymy azaıǵan

NUR-SULTAN. QazAqparat – QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıteti ótken bir jyldyń ishinde 4 myńnan astam shaǵymdy qaraǵan, dep habarlaıdy QazAqparat tilshisi.

Komıteti tóraǵasynyń orynbasary Laýra Ahmetnııazovanyń aıtýynsha, eldegi búkil medıtsınalyq uıymdardyń janynan emdelýshilerdi qoldaý ortalyǵyn quryp, jumysyn jolǵa qoıý úshin on jyldam astam ýaqyt ketken.

«Emdelýshilerdiń ótinimderi tikeleı qaralady. Emdelýshilerdi qoldaý ortalyqtarynyń mindeti - týyndaǵan daýly máseleni nemese problemany sol jerde sheshý. Byltyr 4 myńnan astam ótinim qaraldy. 2020 jyly da sol deńgeıde bolǵan edi. Túsken ótinimderdiń 30 paıyzy negizdi dep aıtýǵa keledi», - dedi Laýra Ahmetnııazova ortalyq komıýnıkatsııalar qyzmetinde ótken sarapshylyq jıynda.

Onyń málimeti boıynsha, túsken shaǵymdardyń 70 paıyzy medıtsınalyq kómektiń sapasyna qatysty bolǵan.

«Negizi týyndaǵan máselelerdiń kóbin medıtsınalyq uıym deńgeıinde-aq sheshýge bolatyn edi. Biz emdelýshilerdi qoldaý ortalyqtarynyń tıimdi jumys isteýine basym baǵyt berip otyrmyz. Sol ortalyqtardyń jumys sapasyn arttyrý kerek. Óıtkeni medıtsına uıymynyń negizgi kúsh-jigeri adamdarǵa sapaly medıtsınalyq kómek kórsetýge baǵyttalýy kerek. Іshki baqylaýǵa ýaqyt pen kúsh shyǵyndaý qosymsha kedergi», - dedi maman.

Sondaı-aq, ol emdelýshilerdiń eń kóp shaǵymdanatyn máselelerin atady.

«Biz qaraıtyn shaǵymdardyń úlken bóligi medıtsınalyq kómek kórsetý, dıagnostıka jáne emdeý standarttarynyń saqtalmaýyna qatysty. Mysaly, staıonarǵa ýaqytynda joldama bermeýi múmkin. Sonyń kesirinen naýqastyń syrqaty asqynady. Nemese qondyrǵy synyp qalǵandyqtan dagnostıka durys jasalmaı jatady», - dedi komıtet tóraǵasynyń orynbasary.

Degenmen, keıingi kezde jedel járdem qyzmetiniń sapasyna qatysty túsetin shaǵymdar sany azaıǵan.

«2017 jyly jedel járdemniń jumysyna rebrendıng jasaldy. Shuǵyl medıtsınalyq kómektiń qoljetimdi bolýy úshin kóp jumys atqaryldy. Biryńǵaı dıspetcherlik qyzmet jumys istep tur. Shaqyrý túskende eń jaqyn jerdegi brıgada jiberiletin boldy. Mamandar jyldam jetý úshin kezekshi mashınalardy uıymdastyrdyq. Osynyń arqasynda qazir jedel járdem qyzmetine shaǵym aıtýshylar kóp emes. Biraq bul jappaı shaǵym azaıdy degen sóz emes. Shuǵyl medıtsınalyq kómek qyzmetine áli de syn kóp»,- dedi Laýra Ahmetnııazova.

Atalǵan sharada balany jekemenshik stomatologııalyq klınıkada joldamasyz-aq tegin emdetýge bolatyny aıtyldy.