Qazaqstandyqtardyń jartysynan kóbi Májilis saılaýyna barady – saýalnama

ASTANA. QazAqparat – 19 naýryzda ótetin kezekten tys Májilis jáne máslıhattar saılaýyna daýys berýshilerdiń jartysynan astamy barmaq. Atalǵan kórsetkish qoǵamdyq saýalnama nátıjesinde anyqtalyp otyr, dep habarlaıdy QazAqparat.

«Qoǵamdyq pikir» zertteý ınstıtýty bıyl 25-28 qańtar aralyǵynda telefon arqyly saýalnama júrgizdi. Oǵan 17 oblystan jáne Astana, Almaty, Shymkent qalalarynan 18 jastan asqan 1200 respondent qatysqan. Respondentterge «Eger aldaǵy jeksenbide parlament saılaýy ótse, siz qatysar ma edińiz?» degen suraq qoıyldy.

«Saýalnama qorytyndysy boıynsha 2023 jyldyń 19 naýryzynda parlament saılaýyna baratyndardyń yqtımal kórsetkishi 53,3% qurady. Onyń ishinde 39% daýys berýge naqty baratynyn aıtsa, qalǵan 14,3% barýy múmkin ekenin jetkizdi. Atalǵan kórsetkish barlyq topta birdeı. ıAǵnı daýys berýshilerdiń jynysyna, jasyna jáne materıaldyq jaǵdaıyna qaramastan», - delingen habarlamada.

Respondentterdiń qalǵan 34,6 paıyzynyń - 11,5% saılaýǵa barmaýy múmkin, 23,1% saılaýǵa barmaıdy.

Suraqqa naqty jaýap bere almaǵandar – 12,1%.

Tsıfrlardyń aýytqýy +/- 2,8% quraıdy.

Málim etilgendeı, azamattardyń aldaǵy saılaýǵa qatysty pikirin bilý Ortalyq saılaý komıssııasynyń resmı ruqsatymen júrgizilgen.