Qazaqstandyqtardyń tutynýyna qansha kólemde kómir qajet

NUR-SULTAN. QazAqparat – Aldaǵy jylytý maýsymynda halyq pen kommýnaldyq mekemelerdi kómirmen qamtý máselesi qalaı júzege asyp jatyr? Jaýabyn bilý úshin QazAqparat tilshisi QR Indýstrııa jáne ınfraqurylymdyq damý mınıstrligine saýal joldaǵan edi.

QR Indýstrııa jáne ınfraqurylymdyq damý mınıstrligi aldaǵy jylytý maýsymy úshin oblystar men respýblıkalyq mańyzy bar qalalar bólinisinde bıýdjettik uıymdar men halyq úshin kómir qajettiligi josparyn daıyndady.

«Atalǵan josparǵa sáıkes kómirdi tutyný kólemi 9,6 mln tonnany quraıdy. Onyń ishinde kommýnaldyq-turmystyq mekemeler úshin 2,6 mln tonna jáne turǵyndar úshin 7 mln tonna. Kómir óndirýshi kásiporyndardyń derekteri boıynsha, bıylǵy 6 aıda energııa óndirýshi kásiporyndarǵa 30 mln tonna, ónerkásiptik kásiporyndarǵa 4 mln tonna jáne kommýnaldyq-turmystyq uıymdar men halyqtyń qoldanýyna 3,7 mln tonna kómir jóneltildi», - delingen mınıstrliktiń QazAqparat saýalyna bergen jaýabynda.

Atalǵan vedomstvonyń habarlaýynsha, aldaǵy jylytý maýsymyna halyqty kómirmen qamtamasyz etý boıynsha daıyndyq naýryz aıynda bastaldy.

Kommýnaldyq-turmystyq uıymdar men turǵyndardyń qajettiligi úshin «Shubarkól Kómir» AQ, «Maıkýben-Vest» JShS jáne «Qarajyra» AQ kómir óndiretin mekemeleri bar.

Aıta ketsek, buǵan deıin qazaqstandyqtarǵa kómirdi aldyn ala satyp alýǵa keńes berilgen edi.

Sondaı-aq QR Indýstrııa jáne ınfraqurylymdyq damý mınıstrligi shet elderge kólikpen kómir áketýge tyıym salynatyny týraly aıtty.