Qazaqstandyqtardyń shetelde tárkilengen múlki qalaı qaıtarylmaq

ASTANA. QazAqparat - Elimizdiń Qarjy mınıstrligi Qazaqstan azamattarynyń shetelde tárkilengen múlikterin qaıtarý protsesin rettemek. Bul týraly búgin Astanada QR Qarjy mınıstrligi Qarjylyq monıtorıng komıtetiniń tóraǵasy Ánýar Jumadildaev aıtty, dep habarlaıdy QazAqparat tilshisi.

«Shetelde tárkilengen múlikterdi qaıtarý máselesi rettelmegen. Máselen, qylmysker bolyp shyǵyp, tutqyndaldy, múlki tárkilendi. Al oǵan kim ıelik etýi kerek. Bizdiń elimiz be, álde basqa ma? Nemese dál osyndaı jaǵdaı bizdiń elimizde ózge eldiń azamatyna qatysty bolýy da múmkin. Kimge qandaı úles tıetindigin ekijaqty kelisimder arqyly qarastyrýǵa tıispiz», - dedi Á.Jumadildaev Ádilet mınıstrligi janyndaǵy zań jobalaý qyzmeti máseleleri jónindegi vedomstvoaralyq komıssııanyń kezekti otyrysynan keıin BAQ ókilderine bergen suhbatynda.

Buǵan deıin, QR Qarjy mınıstrligi elimizde Tárkilengen múlikter qorynyń paıda bolýy múmkin ekendigin habarlaǵan bolatyn. Mundaı jańalyq «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy máseler boıynsha ózgerister men tolyqtyrýlar engizý týraly» zań jobasynyń tujyrymdasynda kózdelgen.