Qazaqstandyqtardyń satyp alý qabileti 10,8 paıyzǵa tómendedi - Indýstrııa jáne saýda mınıstrligi

ANA. Qazannyń 30-y. QazAqparat /Gúlmıra Álıakparova/ - Ústimizdegi jylǵy toǵyz aıdyń qorytyndysy boıynsha Qazaqstanda bólshek saýda aınalymy 1,6 trıllıon teńgeni qurady.

Bul ótken jyldyń sáıkes kezeńimen salystyrǵanda 10,8 paıyzǵa az. Bul týraly búgin ótken baspasóz máslıhatynda QR Indýstrııa jáne saýda mınıstrligi Saýda komıtetiniń tóraǵasy Aıdar Qazybaev málim etti, dep habarlaıdy QazAqparat.

 A.Qazybaevtyń atap kórsetkenindeı, qazaqstandyqtardyń satyp alý qabiletiniń azaıýymen saýda kásiporyndarynyń belsendiligi de tómendeı túsken. Bólshek saýda aınalymynyń eń kóp tómendeý úrdisi respýblıkanyń eki iri qalasynda tirkeldi. Máselen, Astanada - 26 paıyzǵa, Almatyda - 21 paıyzǵa.

Sondaı-aq  ótken toǵyz aıda kóterme saýda aınalymy 4 trıllıon teńgeni qurap, 7,8 paıyzǵa tómendedi. «Bólshek saýda aınalymyna qaraǵanda kóterme saýda aınalymynda aıtarlyqtaı tómendeý úrdisi joq. Degenmen, aı saıyn júrgiziletin taldaý nátıjesi, ótken qyrkúıek aıynda bólshek saýda aınalymy tamyz aıymen salystyrǵanda 4 paıyzǵa artqanyn kórsetti. Qazaqstan ekonomıkasy qalpyna kele bastaǵandyqtan, 2009 jyldyń tórtinshi toqsanynda bul sektordaǵy qarqyn joǵary bolady degen senimdemiz», - dedi ol.