Qazaqstandyqtardyń moınyndaǵy problemalyq nesıe 12 mlrd teńgege artqan

ASTANA. QazAqparat – Qarjy naryǵyn retteý jáne damytý agenttigi qarjy sektorynyń aqpan aıyndaǵy jaı-kúıine sholý usyndy, dep habarlaıdy QazAqparat tilshisi.

Jalpy aqpan aıynda tólem merzimi 90 kúnnen asqan nesıelerdiń kólemi 827 mlrd teńgege jetken.

Qańtar aıynda bul kórsetkish 815 mlrd teńge bolǵan edi. Osy 827 mlrd teńgeniń 504 mlrd teńgesi - jeke tulǵalardyń moınynda.

Qalǵan 323 mlrd teńgesi - zańdy tulǵalardyki. Munyń ishinde shaǵyn jáne orta bıznestiń de «úlesi» bar.

«1 naýryzdaǵy jaǵdaı boıynsha 90 kúnnen astam merzimi ótken bereshegi bar kredıtterdiń kredıt portfeliniń jalpy kólemindegi úlesi 3,4%-dy nemese 827 mlrd teńgeni qurady (2023 jyldyń basynda - 3,4% nemese 815 mlrd teńge). Jeke tulǵalar portfelinde 90 kúnnen astam merzimi ótken bereshegi bar qaryzdardyń deńgeıi 3,8%-dy nemese 504 mlrd teńgeni (1 qańtar 2023 jyl – 3,7% nemese 493 mlrd teńge) ShOB-ty eseptegende zańdy tulǵalar portfelinde – 3,0% nemese 323 mlrd teńge (1 qańtar 2023 jyl – 3,0% nemese 321 mlrd teńge)», - dep jazylǵan sholýda.

Agenttik málimetinshe, merzimi 90 kúnnen asqan kredıtterdi arnaıy rezerv esebinen óteý deńgeıi 76,5% bolǵan.

Bul jyldyń basyndaǵy kórsetkishten 0,4% az.