Qazaqstandyqtardyń kommýnaldyq qyzmetterge qaryzy - 5,8 mlrd. teńge

ASTANA. 24 qyrkúıek. QazAqparat - Qazaqstandyqtardyń kommýnaldyq qyzmetterge qaryzy 5,8 mlrd. teńgeni quraıdy.

Bul týraly búgin Úkimet otyrysynda QR Óńirlik damý vıtse-mınıstri Serik Nokın málim etti. «Ótken jylý berý maýsymynyń sońynda tutynýshylardyń kommýnaldyq qyzmetterge debıtorlyq qaryzy 6,8 mlrd. teńge bolǵan edi. Aǵymdaǵy jyldyń 20 qańtardaǵy jaǵdaı boıynsha ol 5,8 mlrd. teńgeni qurap, 675 mln. teńgege nemese 10 paıyzǵa tómendedi»,-dedi ol. Vıtse-mınıstrdiń atap ótýinshe, tutynýshylardyń kommýnaldyq qaryzdary Astana qalasynda 276 mln., Qostanaı oblysynda 171 mln., Ońtústik Qazaqstan oblysynda 86 mln., Aqmola oblysynda 43 mln., Batys Qazaqstan oblysynda 34 mln. teńgeni quraıdy. Pavlodar oblysynda debıtorlyq qaryz joq. Al, qalǵan óńirlerde qaryzdardyń tómendeý deńgeıi aıtarlyqtaı emes. «Óńirlerdegi daıyndyq jumystarynyń aıaqtalýyn eskere otyryp, mınıstrlikpen kúzgi, qysqy kezeńniń ótýine kúndelikti monıtorıng júrgiziletinin atap ótkim keledi. Osyǵan oraı ákimdikter kúndelikti negizde bekitilgen formaǵa sáıkes 2013-2014 jyldardaǵy jylý berý maýsymynyń ótýi týraly senimdi aqparattardy usynýy qajet»,-dedi S. Nokın.