Qazaqstandyqtardyń kóbisi Mekkede qaıtys bolǵan ata-anasyn sol jerde jerleıdi

ASTANA. QazAqparat - Qazaqstannyń Saýd Arabııasyndaǵy elshiliktiń málimeti boıynsha bıylǵy qajylyq kezinde qazaqstandyqtardyń ishinde adam ólimi tirkelgen joq. Degenmen, otandastarymyzdyń basym bóligi qaıtys bolǵan ata-analaryn sol jerde jerlegendi jón kóredi, xabarlaıdy QazAqparat tilshisi.

«Ústimizdegi jyly 3 000 qazaqstandyq qajylyqqa bardy. Endi, ol jerge barǵannan keıin túrli jaǵdaılar bolyp turady. Bir kisilerdiń densaýlyǵy nasharlaıdy. Bireýler adasyp ketedi, ekinshiler tólqujatyn joǵaltyp alady. Onyń barlyǵy birden sol jerde sheshiledi. Sebebi biz polıtsııamen tyǵyz jumys jasaımyz», - dep atap kórsetti  Qazaqstannyń Saýd Arabııasyndaǵy Tótenshe jáne Ókiletti elshisi Baqyt Batyrshaev.

Onyń aıtýynsha, jyl saıyn qajylyqqa baratyn qazaqstandyqtardyń ishinde 5-8 adam qaıtys bolyp jatady. Olardyń deni - jasy kelgen kisiler. Degenmen, bıylǵy qajylyqta ondaı jaǵdaılar bolǵan joq. Qajylyqqa barǵan qazaqstandyqtardyń barlyǵy aman-esen elge oraldy.

«Endi, adam qaıtys bolǵan jaǵdaıda onyń týǵan-týysqandary «Mekkede jerleımiz» dese, sol jerde qaldyra alady. Elge alyp kelse de bolady. Biraq osy ýaqytqa deıin qazaqstandyqtardyń 95 paıyzy qajylyqta qaıtys bolǵan týystaryn qasıetti Mekkede jerlegendi jón kórdi. Shyny kerek, bir qajylyq maýsymynda kóp adam qaıtys bolady ǵoı. Úsh mıllıonǵa jýyq adam keledi. Árıne, jaǵdaı kóp. Sondyqtan arnaıy jerler bar, bári tegin. Jerleý rásimderin de Saýd Arabııasy ózi tóleıdi. Barlyǵy tegin», - dep atap kórsetti elshi.