Qazaqstandyqtardyń qaryzy qalaı azaıady ?

ALMATY. QazAqparat – QR Ulttyq bankinde QR prezıdentiniń «Qazaqstan azamattarynyń qaryzdyq júktemesin azaıtý týraly» Jarlyǵynyń qalaı júzege asyp jatqany aıtyldy, dep habarlaıdy QazAqparat tilshisi.

Ulttyq banktiń habarlaýynsha, kópbalaly, asyraýshysynan aırylǵan, múgedek bala baǵyp otyrǵan, ataýly áleýmettik kómek alatyn otbasylar, 18 jastan asqan múgedek jandar, ata anasynyń qamqorlyǵynsyz qalǵan 29 jasqa tolmaǵan jáne jetim balalar, kámelettik jasqa tolmaı jatyp ata-anasynan aırylǵan adamdardyń kepilsiz nesıesiniń 300 000 teńgesi keshiriledi.

Búginde memlekettik nesıe bıýrosy QR Eńbek jáne halyqty áleýmettik qorǵaý mınıstrliginiń bergen tizimi boıynsha aqparatty qorytý aıaqtaldy.

Bul materıaldar «Problemalyq nesıeler qoryna» jiberildi.

Jyl sońyna deıin atalǵan qor qarjyny aýdaryp úlgerse bankter men shaǵyn qarjylandyrý ortalyqtary halyqtyń qaryzyn óshiretin bolady.

Odan keıin 2 kún ishinde qaryzy óshirilgen adamdar E-Halyq aqparattyq júıesine tirkeledi.

«500 myńǵa jýyq azamat 100 mlrd teńgeden asa kómek alady. Bunyń nátıjesinde qazaqstandyqtardyń ortasha qaryz júktemesi 40% azaıady degen úmittemiz. 260 myń adamnyń qaryzy túgel keshiriledi», - dedi qarjylyq retteýshi.

Qaryzdyń ótelýi úshin bankterge habarlasýdyń qajeti joq. Barlyq jumystardy kredıtorlar atqarady.

Qarjylyq retteýshi (Ulttyq bank) nesıe problemalaryn azaıtý maqsatynda jyl sońyna deıin onlaın kredıtorlar, lombardtar, nesıe seriktestikteri, taǵy basqa nesıeleý sýbektileriniń jumysyn retteýdiń normatıvtik quqyqtyq bazasyn qolǵa almaq.

Máselen, 90 kúnnen asa tólenbeı qalǵan qaryzdarǵa komıssııa taǵy basqa ústemelerdi jamaýǵa tyıym salynady.

Bul ózgerister QR Parlamentine qyrkúıekte engiziledi. Sonymen qatar, birqatar zańǵa ózgeris enedi. Atap aıtqanda, qaryz alýshynyń áleýmettik mártebesi, tólem qabileti, tabysy esepteledi.