Qazaqstandyqtardyń qanshasy qolma-qol aqshany paıdalanady

ASTANA. QazAqparat - Ulttyq banki «Qolma-qol aqshany paıdalanýdyń orta merzimdi perspektıvalary» taqyrybyndaǵy áleýmettik zertteýdiń nátıjelerin jarııalaı bastady. Qazaqstandaǵy ekonomıka sýbektileriniń tólem qalaýy týraly zertteý alǵash ret júrgizilip otyr, dep habarlaıdy QazAqparat.

Qarjy uıymynyń málimetinshe, mundaǵy negizgi maqsat – qolma-qol aqsha aınalymynyń damý tendentsııalaryn, qolma-qol aqshaǵa suranysty qalyptastyratyn faktorlardy anyqtaý, sondaı-aq ekonomıka sýbektileriniń qolma-qol aqsha men olardyń nomınaldy qurylymyn paıdalanýyn zertteý.

«Zertteý saýalnama ádisimen úsh kezeńde júrgizildi. Sonymen qatar, respondentterdiń tólem kúndelikterine taldaý jasaldy, onyń kómegimen respondentter apta ishinde barlyq shyǵyndaryn tirkedi: somalar, tólem orny, tólem ádisi jáne t. b.

Saýalnamaǵa 9 628 respondent qatysty, onyń ishinde 6 095 jeke tulǵa, 3 533 kásipkerlik sýbekti bar. Zertteý Qazaqstannyń 17 oblysyn jáne respýblıkalyq mańyzy bar 3 qalany qamtydy», - dep jazdy Ulttyq bankten.

Ondaǵy málimetterge qaraǵanda respondentterdiń 60 %-y qolma-qol aqshany kúndelikti esep aıyrysý úshin, 72 %-y qolma-qol aqshany alý úshin bank kartasyn paıdalanady. 31%-y shaǵyn jáne orta nomınaldardaǵy suranysty atap ótse, qatysýshylardyń aptasyna qolma-qol shyǵystarynyń ortasha mólsheri 27 myń teńgeni qurady. Olardyń shyǵystarynyń qolma-qol aqshaǵa tıesili úlesi - 35%. 74%-y qolma-qol aqshasyz tólem quraldaryn paıdalanady, kásipkerler aınalymyndaǵy qolma-qol aqshanyń úlesi - 35%.