Qazaqstandyqtardyń qandaı gazet-jýrnaldy kóbirek oqıtyny belgili boldy
«2021 jyldyń birinshi toqsany qorytyndysy boıynsha «Qazposhta» AQ arqyly Qazaqstanda gazetter men jýrnaldarǵa jazylýdyń jalpy kólemi 55,6 mln danany qurady. Respýblıkalyq gazetterdiń úzdik bestigine «Egemen Qazaqstan», «Kazahstanskaıa pravda», «Polıtsııa KZ», «Qazaqstan temirjolshysy» jáne «Uıǵyr avazı» basylymdary kirdi. Aımaqtyq kóshbasshylar arasynda «Jetisý», «Aqtóbe», «Ońtústik Qazaqstan», «Aq Jol», «Ortalyq Qazaqstan» gazetteri bar», - delingen «Qazposhta» AQ baspasóz habarlamasynda.
Baspasóz habarlamasynda jazylǵandaı, el boıynsha barlyǵy 170 respýblıkalyq jáne 543 aımaqtyq gazet jazylym boıynsha taratylady. Jazylýdyń jalpy kólemindegi respýblıkalyq basylymdardyń úlesi 44%, óńirlik basylymdardyń úlesi 54% qurady. Tırajdyń 2%-y halyqaralyq merzimdi basylymdarǵa tıesili.
«Gazetter men jýrnaldarǵa jazylý aýyldarda kóp tirkelgen. Jazylýdyń jalpy kóleminde onyń úlesi 71% quraıdy. Aýyl turǵyndary oblystyq, qalalyq jáne aýdandyq basylymdarǵa jazylǵandy (jalpy tırajdyń 58%-y) jón kóredi», - delingen habarlamada.
Jazylý boıynsha Qazaqstannyń óńirleri arasynda Almaty, Aqtóbe, Qaraǵandy jáne Jambyl oblystary kósh bastap tur.
«2020 jyldyń qorytyndysy boıynsha jazylýdyń jalpy kólemi 90,3 mln danany qurady. Bıylǵy jyldyń ekinshi jartyjyldyǵyna jazylý 5 sáýir kúni bastaldy. Jyl sońynda kórsetkishter 25-30% ósedi, biraq tutastaı alǵanda ótken jyldyń kórsetkishinen aspaıdy. Biz elektrondy basylymdarǵa kóshý – jalpy álemdik trend ekenin túsinemiz. Ony qazaqstandyq statıstıka da rastaıdy», - dedi «Qazposhta» AQ «Poshtalyq servıs» fılıaly dırektory Nurjan Jabaev.