Qazaqstandyqtardyń emdelý kezinde densaýlyǵyna keltirilgen zalal óteledi

ASTANA. QazAqparat – Qazaqstandyqtardyń medıtsınalyq kómek alý kezinde densaýlyǵyna keltirilgen zalal óteledi. Mundaı norma medıtsına qyzmetkerleriniń kásibı jaýapkershiligin saqtandyrýǵa baılanysty jańa zań jobasynda qarastyrylǵan. Bul týraly Májilis depýtaty Ǵalymjan Eleýov málim etti, dep habarlaıdy QazAqparat.

Densaýlyq saqtaý máselelerine qatysty túzetýler qazir Májiliste qaralyp jatyr. Olardy qabyldaý nátıjesinde densaýlyq saqtaý uıymdary kórsetetin medıtsınalyq qyzmetterdiń sapasy da arttyrylmaq.

«Tıisti zań jobasyn Densaýlyq saqtaý mınıstrligi Memleket basshysynyń Ulttyq qoǵamdyq senim keńesiniń úshinshi otyrysynda alǵa qoıǵan mindetterin iske asyrý maqsatynda ázirledi. Prezıdent medıtsına qyzmetkerleriniń quqyqtyq jáne qarjylyq qorǵalýy men jaýapkershiligine, onyń ishinde kásibı qyzmetine kepildik beretin júıeni ázirlep, engizýdi tapsyrǵan bolatyn.

Halyq densaýlyǵy jáne densaýlyq saqtaý júıesi týraly kodeks pen Qylmystyq kodekske, sondaı-aq «Qazaqstan Respýblıkasynyń memlekettik nagradalary týraly» zańǵa ózgerister men tolyqtyrýlar engizý usynylyp otyr. Jalpy, túzetýler medıtsına qyzmetkerleriniń mártebesin arttyrýǵa, patsıentter quqyqtaryn qorǵaýǵa jáne medıtsınalyq kómek sapasyn arttyrýǵa baǵyttalǵan», - deıdi Májilis depýtaty, dáriger, medıtsına ǵylymdarynyń kandıdaty Ǵalymjan Eleýov.

Zań jobasy aıasynda medıtsına qyzmetkerleriniń kásibı jaýapkershiligin qoldanystaǵy saqtandyrý kompanııalary arqyly boljamdy saqtandyrý júıesi ázirlengen.

«2023 jyldan bastap medıtsınalyq uıymnyń ózi saqtandyrýshy bolady, al 2025 jyldan bastap medıtsınalyq uıym men medıtsına qyzmetkeri saqtandyrý jarnalaryn teń úleste tóleıdi. Bul birlesken kásibı jaýapkershilikke ákeledi. Bul rette medıtsınalyq uıym patsıentterden nemese olardyń týystarynan túsken shaǵymdardy medıatsııany jáne mamandandyrylǵan medıtsınalyq birlestikterdi tarta otyryp ishki aýdıt qyzmeti deńgeıinde qaraıtyn bolady. Kelispeýshilik týyndaǵan jaǵdaıda shaǵymdar saraptamalyq qorytyndy berý úshin medıtsınalyq jáne farmatsevtıkalyq baqylaý komıtetiniń aýmaqtyq bólimshelerine beriledi», - deıdi depýtat.

Sondaı-aq, zań jobasynda medıtsına nemese farmatsevtıka qyzmetkeriniń kásibı mindetterin tıisinshe oryndamaǵany úshin qylmystyq quqyq buzýshylyqtardy izgilendirý jáne Qylmystyq kodekstiń 317-babynyń sanktsııalaryn azaıtý usynylady.

Túzetýlerge memlekettik jáne vedomstvolyq nagradalar da engiziledi. Olar: birjolǵy tólemmen «Qazaqstan Respýblıkasynyń eńbek sińirgen dárigeri» ataǵy, «Úzdik maman» respýblıkalyq konkýrsynyń jeńimpazy.

Qazirgi ýaqytta zań jobasy qoǵam belsendileri men dárigerlerdiń qatysýymen jumys tobynda qaralyp jatyr.