Qazaqstandyqtardyń bılik ınstıtýttaryna degen senimi qandaı

NUR-SULTAN. QazAqparat – Qazaqstan halqynyń bılikke degen senim deńgeıin anyqtaý maqsatynda el aýmaǵynda monıtorıng jasalyp, saýalnama júrgizildi, dep habarlaıdy QazAqparat tilshisi.

«Halyqtyń bılik ınstıtýttaryna degen senimi ózgerissiz qalyp otyr. Eldegi barlyq deńgeıli bıliktiń vertıkali boıynsha halyqtyń basym bóligi, ıaǵnı 81,4 paıyzy Memleket basshysyna senim artyp otyr. Osy tusta aıtyp ótken jón, ótken jyldyń qarasha aıynan bastap, barlyq bılik ınstıtýttaryna degen halyqtyń senimi azaıǵan. Atap aıtqanda, Úkimetke 18 paıyzǵa, Parlamentke 15 paıyzǵa jáne oblys ákimderine 13 paıyzǵa deıin senim tómendegen. Sonymen qatar halyqtyń eldimekender ákimderine degen senimi 5,7 paıyzǵa, máslıhattarǵa 15 paıyzǵa jáne saıası partııalarǵa 14,6 paıyzǵa tómendegen», - dedi QR Prezıdenti janyndaǵy Qazaqstan strategııalyq zertteýler ınstıtýty dırektorynyń orynbasary Alýa Joldybalına monıtorıng nátıjesimen tanystyra otyryp.

Instıtýt basshysy orynbasarynyń málimetinshe, saýalnamaǵa qatysqan azamattardyń 43,7 paıyzy saıası partııalardyń qyzmetine senip, oń baǵa beredi.

«Saýalnama kezinde respondentterge jańa partııalarǵa qatysty suraq qoıyldy. Sonyń aıasynda respondentterdiń 48,4 paıyzy jańa saıası partııany qoldaýǵa daıyn ekenin jetkizdi. Al saýalnamaǵa qatysqan árbir úshinshi azamat jańa partııany qoldaýǵa daıyn emes ekendigin alǵa tartty. Jáne qatysýshylardyń 15,8 paıyzy atalǵan suraqqa jaýap berýge qınalatyndyǵyn aıtty», - deıdi ol.

Buǵan deıin Alýa Joldybalına «Qazaqstandyqtar «Halyq únine qulaq asatyn memleket» qaǵıdatyna sene me?» degen saýalǵa qatysty pikir bildirdi.