Qazaqstandyqtardyń basym bóligi eldegi saıası partııalardyń belsendiligi joǵary dep sanaıdy - Áleýmettik zertteý

ASTANA. 5 maýsym. QazAqparat -  «Nur Otan» Halyqtyq demokratııalyq partııasy janyndaǵy Parlamentarızm ınstıtýty 2012 jyldyń 1-3 maýsym aralyǵynda Qazaqstannyń turǵyndary arasynda «Qazaqstandaǵy qoǵamdyq-saıası ahýal jáne Qazaqstan Respýblıkasy Parlamentiniń qyzmeti» taqyrybynda saýalnamalyq zertteý ótkizgen bolatyn.

Osyǵan oraı, búgin Parlamentarızm ınstıtýty áleýmettik zerteýler nátıjelerine arnalǵan baspasóz máslıhatyn ótkizdi.

Zertteý barysyna elimizdiń 14 oblys ortalyǵy men Astana jáne Almaty qalalarynda turatyn 18 jastan joǵary 1 myń 120 adam suraldy. Bul rette zertteýdi júrgizýshiler respondentterdi irikteý úshin kezdeısoq tańdaý tásilin qoldandy. Sondyqtan da, mamandardyń pikirinshe, saýalnama qorytyndylarynyń aýytqýshylyqtary 95 paıyzdyq senimdilik ıntervalynda (+; -) 5 paıyzdy quraıtyn bolady.

«Saýalnamaǵa qatystyrylyp suralǵandardyń 57,8 paıyzy Qazaqstannyń saıası partııalary joǵary belsendilik tanytýda jáne turaqty is-sharalar ótkizip jatyr dep sanaıdy. Al 22,5 paıyz respondenttiń partııalar týraly áldeqandaı habarlary bolǵanymen, olardyń naqty turaqty jumysy sezilmeıtindigin atap ótedi. Suralǵandardyń 10,2 paıyzynyń pikirinshe, elimizdegi partııalardyń belsendiligi tómen. Olar «saılaýdan keıin partııalar kórinbeıdi, olardyń úni estilmeıdi»   dep kórsetken», - deıdi brıfıng barysynda Parlamentarızm ınstıtýtynyń aǵa sarapshysy Qaıratbek Jamanǵulov.