Qazaqstandyqtardyń banktegi shottaryna qoıylǵan shekteýler alynady
Memleket basshysynyń tapsyrmasyn oryndaý sheńberinde Memlekettik áleýmettik saqtandyrý qorynan tótenshe jaǵdaıǵa baılanysty tabysynan aıyrylǵan adamdarǵa 42500 teńge somasynda aı saıynǵy áleýmettik kómek aýdarý bastaldy.
«Osyǵan oraı, aýmaqtyq Memlekettik kirister departamentteri táýekel dárejesi joǵary salyq tóleýshilerdi qospaǵanda, dara kásipker retinde tirkeýde turǵan jeke tulǵalarǵa jáne jeke praktıkamen aınalysatyn tulǵalarǵa qatysty shyǵarylǵan bank shottary boıynsha shyǵys operatsııalaryn toqtata turý týraly ókimder men ınkassalyq ókimderdi qoldap keri qaıtarýda.
Sondaı-aq, komıtet tarapynan Ádilet mınıstrligine jáne Jeke sot oryndaýshylardyń respýblıkalyq palatasyna buryn shyǵarylǵan sot buıryqtary men sheshimderin, sondaı-aq jiberilgen salyq buıryqtary boıynsha azamattardyń kez kelgen shottaryna salynǵan tyıym salýdyń áreketterin ýaqytsha toqtata turýdy jáne jeke tulǵanyń bereshegin óndirip alý týraly oryndaýdaǵy salyq buıryqtary boıynsha tyıym salýdy toqtata turýdy surap, hat joldady», - delingen aqparatta.
Eske sala keteıik, osyǵan deıin mıkro, shaǵyn nemese orta kásipkerlik sýbektileri sanatyna jatqyzylǵan salyq tóleýshiler úshin salyqtardyń barlyq túri men áleýmettik tólemder boıynsha tólem merzimi 2020 jyldyń 1 maýsymyna deıin keıinge qaldyryldy. Sondaı-aq táýekel dárejesi joǵary salyq tóleýshilerdi qospaǵanda, salyq jáne keden bereshegin, áleýmettik tólemder boıynsha bereshekti májbúrlep óndirip alý sharalaryn jáne merziminde oryndalmaǵan salyq mindettemesin oryndaýdy qamtamasyz etý tásilderin qoldaný aǵymdaǵy jyldyń 1 maýsymyna deıin toqtatyldy (QR Úkimetiniń 2020 jylǵy 27 naýryzdaǵy № 141 qaýlysynyń 4.1) jáne 4.2)-tarmaqshalary).