Qazaqstandyqtardyń 98 paıyzy qazaq eliniń azamaty bolǵanyn maqtan tutady - E.Toǵjanov

ASTANA. QazAqparat - Qazaqstandyqtardyń 98 paıyzy qazaq eliniń azamaty bolǵanyn maqtan tutady. Bul týraly elordada ótip jatqan Qazaqstan halqy Assambleıasynyń «Beıbitshilik pen kelisim mádenıeti» atty ІІ halyqaralyq medıa forýmnyń jalpy sessııasynda QHA Tóraǵasynyń orynbasary - hatshylyq meńgerýshisi Eraly Toǵjanov aıtty.

«Sońǵy áleýmettik saýalnamalarǵa sáıkes halyqtyń 98 paıyzy bizdiń elimizdiń azamaty ekendigin maqtan tutatyndyǵyn bildirgen. 95 paıyzy basqa barlyq etnostardyń ókilderine oń kózqarasta ekendigin atap ótken», - dedi ol. Sonymen qatar E.Toǵjanov bul bos sandar emestigin, eldegi shynaıy ahýaldyń naqty kórinisi ekendigin atap ótti. Elimizde júrgizilip jatqan keshendi jumystardyń aıqyn nátıjesi ekendigin basa aıtyp, bıylǵy jyl Qazaqstan halqy Assambleıasy jyly ekendigine erekshe toqtaldy. «Qazaqstan halqy Assambleıasynyń jyly - ol eldiktiń, birliktiń, beıbitshiliktiń jyly. Búgingi forýmnyń da maqsaty belgili. Jalpy, dúnıejúzinde júrip jatqan kóptegen trendter bar. Solardy tarazydan ótkizip, saraptap, óz ishimizde de keńinen talqylaıtyn ýaqyt jetti dep oılaımyn», - dedi ol.