Qazaqstandyqtardyń 93,6 paıyzy Májilistiń kezekten tys saılaýyn ótkizýdi oryndy dep esepteıdi - áleýmettik zertteýler

ASTANA. QazAqparat - Qazaqstandyqtardyń 93,6 paıyzy QR Parlamenti Májilisiniń kezekten tys saılaýyn ótkizý bastamasyn oryndy dep esepteıdi. Bul týraly búgin Qoǵamdyq pikirdi zertteý ortalyǵynyń dırektory Aıgúl Sádýaqasova málim etti.

«Saılaýaldy áleýmettik zertteýlerde biz saýldardy 2 myń respondentten kem almaımyz. «Exit-poll» barysynda keminde 40 myń respondentten pikir alynady. 2016 jyly qańtar aıynda biz 2100 respondentten jaýap alyp úlgerdik. Onyń ishinde 93,6 paıyz qazaqstandyqtar QR Parlamenti Májilisiniń kezekten tys saılaýyn ótkizý bastamasyn oryndy dep esepteıdi jáne 97,2 paıyzy Elbasynyń sheshimin qoldaıdy degen málimetterdi aldyq.

Sonyń ishinde, negizgi qoldaý sebepterin alatyn bolsaq, halyq parlamentte jáne máslıhatta ekonomıkalyq máselelerdi sheshý, qazirgi kúngi maqsattaryn túsinetin, isker, saýatty, el qundylyqtaryna berik azamattar shyǵýyn qalaıdy jáne Elbasynyń kezekten tys parlamenttik saılaýdy ótkizý týraly sheshimimen tolyq kelisedi.
Saılaý qıyn kezeńde halyqty biriktiredi. Sondyqtan, menińshe, osy 2016 jylǵy saılaý kezeńinde áleýmettik zertteýler de qoǵamnyń óziniń negizgi qyzmetterin atqarady», - dedi ol.
Onyń sózi boıynsha, bul elektoraldyq protsesterde áleýmettik zertteýler birneshe qyzmet atqarady. Sonyń ishinde, eń mańyzdysy - bul qoǵamdy resmı emes málimettermen tanystyrý jáne elektoraldy dınamıkany kórsetip otyrý.