Qazaqstandyqtardyń 90%-y qaıyrymdylyq jasaýdy qoldaıdy - saýalnama

NUR-SULTAN. QazAqparat – Qazaqstandyqtardyń 90%-y qaıyrymdylyq jasaý kerek dep esepteıdi. Kórsetkish saýalnamanyń nátıjesinde anyqtalyp otyr. Bul týraly QR Aqparat jáne qoǵamdyq damý vıtse-mınıstri Danııar Qadyrov málim etti, dep habarlaıdy QazAqparat tilshisi.

«Ótken jyly Qazaqstan qoǵamdyq damý ınstıtýtynyń «Qaıyrymdylyq pen donorlyq júıesi» atty áleýmettik zertteýine qatysqandardyń 90%-y qaıyrymdylyq jasaýdy qoldaıtyndaryn bildirdi. Zertteý saýalnamaǵa elimizdiń 17 óńirinen 1 200 respondent qatysty. Saýalnama nátıjesi kórsetkendeı, árbir ekinshi azamat (46%) adam múmkindigine qaraı qaıyrymdylyqpen aınalysýǵa tıis dep esepteıdi», - dedi Danııar Qadyrov elordada ótken «Qazaqstan halqyna» qorynyń qorytyndy otyrysynda.

Vıtse-mınıstr keltirgen málimetke sáıkes, zertteý saýalnamasyna qatysqandardyń 37%-y qaıyrymdylyqty turaqty túrde jasaıdy, al respondentterdiń 24%-y jarty jylda bir ret jáne 20%-y jylyna bir ret kómek-qoldaý kórsetedi.

«Qaıyrymdylyq salasyn júıeli qoldap, damytý maqsatynda ulttyq zańnamaǵa ózgerister engizildi. Atap aıtqanda, bıyl «Qaıyrymdylyq týraly» zańǵa engizilgen túzetýler sheńberinde qaıyrymdylyq uıymdary úshin memlekettik menshik obektilerin (satyp alý quqyǵynsyz senimgerlik basqarý) jeńildikpen paıdalaný kózdelgen. Sondaı-aq, birqatar shara qaıyrymdylyq kómektiń ashyqtyǵyn arttyrýǵa baǵyttalyp otyr», - deıdi ol.

Buǵan deıin habarlaǵanymyzdaı, elimizde 1 myńnan astam qaıyrymdylyq qory qyzmet etedi.