Qazaqstandyqtardyń 76%-ǵa jýyǵy Ata Zańǵa túzetýler engizýdi qoldaıdy – Qoǵamdyq saıasat ınstıtýty

NUR-SULTAN. QazAqparat - Qazaqstandyqtardyń 75,9%-y Konstıtýtsııaǵa engiziletin ózgertýler men tolyqtyrýlardy qoldaýǵa daıyn. AMANAT partııasy janyndaǵy Qoǵamdyq saıasat ınstıtýty «Áleýmet» jobasy aıasynda júrgizilgen Referendum: Halyq üni zertteýiniń qorytyndysyn jarııalady, dep habarlaıdy QazAqparat tilshisi.

Uıymnyń málimetinshe, el turǵyndarynyń 67,9% Konstıtýtsııalyq reforma eldiń damýyna oń áser etedi dep esepteıdi. Sondaı-aq áleýmettik derekter azamattardyń kópshiligi qoldanystaǵy Konstıtýtsııany ózgertý boıynsha referendým ótkizýge oń kózqaras tanytyp otyrǵanyn kórsetti.

«Sońǵy áleýmettik zertteýlerdiń nátıjesi qazirgi qoǵamdyq-saıası úderisterdiń oń baǵalanatynyn dáleldedi. Azamattardyń 87,5%-y belgili bir dárejede el ómirindegi ózgeristerdi qalaıdy. Suralǵandardyń 55,4%-y belsendi azamattyq ustanymǵa ıe. Zertteýge elimizdiń barlyq óńirinen 1700-den astam respondent qatysty»,- dedi Qoǵamdyq saıasat ınstıtýtynyń dırektory Mádına Nurǵalıeva.

Aıta keteıik, júıeli áleýmettanýdy qalyptastyrý maqsatynda «Áleýmet» jobasy turaqty negizde zertteýler júrgizedi.