Qazaqstandyqtardy medıtsına mamandarymen qamtý úlesi - Eýroodaq deńgeıinde

ASTANA. QazAqparat – Qazaqstan turǵyndaryn medıtsına mamandarymen qamtý deńgeıi Eýroodaq kórsetkishimen sáıkes keledi. Bul týraly Densaýlyq saqtaý mınıstri Ajar Ǵınııat málim etti, dep habarlaıdy QazAqpraat tilshisi.

«Medıtsına mamandarynyń qyzmeti únemi táýekelge alyp keledi. Olardyń jumysy kúrdeli ári jaýapkershiligi joǵary. Búginde elimizde densaýlyq saqtaý salasynda 267 myń medıtsına qyzmetkeri eńbektenip jatyr. Onyń ishinde 78 myńnan astam dáriger jáne 188 800 orta medıtsına qyzmetkeri bar. 10 myń turǵynǵa shaqqanda dárigerlermen qamtamasyz etý 40,9 paıyz, al orta medıtsına qyzmetkerlerimen qamtý 98,7 quraıdy. Bul Eýroodaq elderiniń kórsetkishterimen sáıkes keledi», - dedi Ajar Ǵınııat Úkimet otyrysynda baıandama jasaı otyryp.

Mınıstrdiń málimetinshe, degenmen, densaýlyq saqtaý júıesinde kadr jetispeýshiligi bar. Atap aıtqanda, 7621 maman tapshy. Onyń ishinde 3916 dáriger jáne 3705 orta medıtsına qyzmetkeri.

«Medıtsına kadrlarynyń kásibılik deńgeıin úzdiksiz kóterý maqsatynda tálimgerlik ınstıtýtynyń jumysy jalǵasyn tabady. Sonymen qatar jergilikti atqarýshy organdar qarajaty esebinen qosymsha járdemaqy tólene beredi. Sol sııaqty densaýlyq saqtaý mamandaryn turǵyn úıler jáne jataqhanalar salýdy júzege asyrý, baspanany jalǵa berý jáne basqa da sharalar iske asyrylady», - deıdi ol.

Buǵan deıin elimizde medıtsına mekemesi ǵımarattarynyń 44,7 paıyzy tozǵany týraly habarlaǵan edik.