Qazaqstandyqtardy elge qaıtarý jumysy jalǵasady - SІM «Jýsan» operatsııasy jaıly
«Jýsan» operatsııasy tikeleı Elbasynyń tapsyrmasymen oryndalǵan jáne bul týraly keshe arnaıy málimdemeni estidińizder. Elbasy aıtqandaı, Qazaqstan óziniń azamattaryna árdaıym qoldaý kórsetedi. Bul gýmanıtarlyq operatsııa, eń aldymen, Elbasymyzdyń halyqaralyq arenadaǵy joǵary bedeliniń jáne elimizdiń beıbitshilik bastamalary, qaǵıdattary negizinde jasalǵan bolatyn», - dedi Erjan Ashyqbaev SІM-de BAQ ókilderi úshin ótken baspasóz máslıhatynda.
Onyń aıtýynsha, Qazaqstan Sırııadaǵy janjaldy toqtatý jáne sol elde beıitshilik pen turaqtylyqty ornatý protsesine belsendi atsalysyp keledi. Sırııa boıynsha Astana protsesi sheńberinde sońǵy eki jyldyń ishinde kelissózderdiń 11 raýndy Astanada ótkizilgen bolatyn. Atalǵan kelissózderdiń arqasynda Sırııanyń kóptegen aımaqtarynda qantógis toqtatylyp, beıbitshilik ornaǵan.
«Halyqaralyq terrorızmmen kúresý bizdiń BUU Qaýipsizdik keńesi sheńberindegi abyroımen aıaqtaǵan qyzmetimizde de erekshe oryn alǵan bolatyn. Qazaqstan Respýblıkasy BUU Qaýipsizdik keńesiniń 2017 jylǵy 21 jeltoqsanda qabyldanǵan 23-96 qararyn tolyǵymen qoldap, onyń aıasynda qyzmet atqaryp keledi. Atalǵan qarar BUU múshe memleketterine sheteldik terrorıster tarapynan qaýip-qaterlerdi anyqtap, qarsy turýǵa qolǵabys etýdi, ásirese Sırııa jáne Irakta qaqtyǵys bolyp jatqan aımaqtardan qaıtyp oralǵan terrorıstermen kúresýge baǵyttalǵan. Ótkizilgen operatsııa tolyǵymen gýmanıtarlyq sarynda. Ony uıymdastyrýǵa jáne sátti ótkizýge Qazaqstannyń birqatar memlekettik organdarynyń ókilderi belsene atsalysty. SІM tarapynan áriptesterimizge rızashylyq bildiremiz», - dedi ol.
Erjan Ashyqbaev sonymen birge, QR SІM kóptegen shet memleketter jáne halyqaralyq uıymdarǵa alǵys bildiretinin aıtyp ótti.
«Olarmen dıplomatııalyq deńgeıde, arnaıy qyzmetter arasynda kelissózdermen birlesken is-sharalar atqarylyp keledi. Qazaqstandyqtardy, ásirese, Elbasy keshe aıtyp ótkendeı, jas balalardy elge qaıtarý jumystary jalǵasyn tabady. Biz bul maqsat boıynsha shet memlekettermen jáne halyqaralyq uıymdarmen, azamattyq qoǵam ókilderimen tyǵyz baılanysta jumys isteımiz», - dep túıdi vıtse-mınıstr.
Eske sala ketsek, keshe Memleket basshysy Nursultan Nazarbaev Sırııadan Qazaqstan azamattaryn evakýatsııalaý boıynsha gýmanıtarlyq operatsııaǵa baılanysty málimdeme jasaǵan bolatyn. Memleket basshysy atap ótkendeı, 6 qańtarda quqyq qorǵaý organdary men Syrtqy ister mınıstrligi júrgizgen gýmanıtarlyq shara nátıjesinde Sırııadan Qazaqstannyń 47 azamaty, sonyń ishinde 30 bala elge qaıtaryldy.