Qazaqstandyqtar joldyń sapasyn telefon arqyly baǵalaıtyn bolady

NUR-SULTAN. QazAqparat – Bıyl kúzden bastap, qazaqstandyqtar joldardyń sapasyn mobıldi qosymsha arqyly baǵalaı alady, dep habarlaıdy QazAqparat tilshisi.

«Biz elimizdegi joldardyń sapasyn obektıvti túrde baǵalaýǵa bolatyn «Sapaly jol» atty jobalyq keńse ashtyq. Bul jobaǵa qoǵamnyń árbir belsendi azamaty qatysa alady. Osy arqyly azamattyq qoǵammen birlese otyryp, joldardyń sapasyn qadaǵalaýmen qatar onda oryn alýy múmkin sybaılyq jemqorlyqtyń aldyn alǵymyz keledi. ıAǵnı endigi ýaqytta qazaqstandyqtar joldyń sapasyna óz baǵalaryn bere alady. Onyń ishinde óńirlik joldarmen qosa, respýblıkalyq mańyzy bar joldar da bar», - dedi QR Sybaılas jemqorlyqqa qarsy is-qımyl agenttigi parasattylyq departamentiniń dırektory Danııar Sabyrbaev agenttikte ótken baspasóz máslıhatynda.

Departament basshysynyń sózine sensek, búginde joldyń sapasyn qadaǵalap, baǵalaıtyn mobıldi qosymsha ázirlenip, testileýden ótkizilýde.

«Aldaǵy qyrkúıek aıynan bastap, árbir turǵyn jolda kele jatyp onyń sapasyna ózindik baǵasyn bere alady. Barlyq uıaly telefonda akselerator bar, ol sizdiń júrgen qadamyńyzdy esepteıdi. Sol sııaqty bizdiń qosymsha da arnaıy joldyń sapasyn anyqtaıtyn arnaıy datchık bar. Siz jolǵa shyqqanda smartfondy kóliktiń paneline qoıasyz. Eger jol jaqsy bolsa, telefonyńyz qozǵalmaıdy. Al jol tegis emes nemese shuńqyr bolsa tıisinshe vıbratsııa beredi. Tasjol qanshalyqty shuńqyrǵa toly bolsa, tıisinshe vıbratsııa da jıi bolady. Jolaýshylardyń bergen baǵasy sol sátte publicbudget.kz saıtyndaǵy derekter qoryna jiberiledi», - dedi ol.

Onyń aıtýynsha, óz kezeginde joldyń sapasyn baǵalaý jobasyn «QazAvtoJol» ulttyq kompanııasy qoldap otyr.