Qazaqstandyqtar jeke málimetterin zańsyz jarııalaǵandardy jazalaı alady

NUR-SULTAN. QazAqparat - QR Tsıfrlyq damý, ınnovatsııalar jáne aeroǵarysh ónerkásibi mınıstrligi azamattardyń derbes derekterine qatysty quqyǵynyń buzylý faktileri boıynsha tekserý júrgizedi, dep habarlaıdy QazAqparat.

Azamattar jeke derekteriniń zańsyz jarııa bolý faktilerin anyqtaǵan jaǵdaıda mınıstrlikke habarlasyp, arnaıy tekserý júrgizýin suraı alady. Ol úshin [e-mail] elektrondy poshtasyna hat joldap nemese «Elektrondy úkimet» portalyndaǵy mınıstrdiń jeke blogyna jazýyna bolady.

«Ótinish bergen kezde ákimshilik quqyq buzý belgileri boıynsha málimetter jetkilikti bolýy kerek: rastaıtyn materıaldar, quqyq buzý sýbektisi týraly aqparat jáne merzimi. Anonım ótinishter qaralmaıdy. Mınıstrlik óz kezeginde quqyq buzýshyǵa qatysty tekserý júrgizedi. Ár tekserý QR Bas prokýratýrasynyń quqyqtyq statıstıka jáne arnaıy esepke alý komıtetinde tirkeýden ótedi jáne kásipkerlerdiń quqyǵyn qorǵaý maqsatynda QR Kásipkerlik kodeksine jáne QR ÁQBK sáıkes júrgiziledi» delingen habaralmada.

Fakt rastalǵan jaǵdaıda ákimshilik jaza qoldaný týraly sheshim shyǵady.

Bul rette ýákiletti organ shaǵyn bızneske 2023 jylǵy 1 qańtarǵa deıin jospardan tys tekserý júrgizbeý týraly moratorııge qaramastan, shaǵyn bıznes sýbektilerine tekserý júrgizbeı-aq ákimshilik is qozǵaýǵa quqyly. Eń bastysy, quqyq buzý faktisin rastaıtyn qajetti materıaldardy tolyq usyný.

Esterińizge sala keteıik, bıylǵy maýsymda Memleket basshysy «Tsıfrlyq tehnologııalardy retteý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zańǵa qol qoıǵan bolatyn.

Bul zańda mınıstrlik derbes derekterdi qorǵaý salasyndaǵy ýákiletti organ dep kórsetilgen.