Qazaqstandyqtar jarylǵysh zarttar men oq-dári taýyp alǵan jaǵdaıda ne isteýi tıis

NUR-SULTAN. QazAqparat – Іshki ister mınıstrliginiń resmı ókili Nurdildá Oraz jarylǵysh zarttar men oq-dári taýyp alǵan jaǵdaıda ne isteý kerektigin aıtty, dep habarlaıdy QazAqparat tilshisi.

«Jarylǵysh materıaldar men oq-dáriler taýyp alǵan jaǵdaıda olarǵa tıispeý kerek jáne tasymaldaýǵa bolmaıdy. Mundaı jaǵdaıda azamattardan jazataıym oqıǵalar men jaraqattanýdyń aldyn alý úshin polıtsııaǵa «102» nemese «112» telefondary boıynsha habarlaýdy suraımyz», - dedi ІІM resmı ókili.

Onyń sózine qaraǵanda, qańtar aıyndaǵy oqıǵalar kezinde qylmyskerler qarý-jaraq dúkenderinen, quqyq qorǵaý jáne arnaıy organdardyń ǵımarattarynan atys qarýy men oq-dárilerdi urlap áketken.

«Olar zańsyz maqsattarǵa paıdalanylyp, sondaı-aq azamattardyń ómiri men densaýlyǵyna zııan keltirýi múmkin. Qarý men oq-dárilerdi zańsyz saqtaǵany úshin qylmystyq jáne ákimshilik jaýapkershilik qarastyrylǵanyn atap ótý qajet.

Esterińizge sala keteıin, zańsyz saqtalǵan qarýdy, oq-dárilerdi jáne jarylǵysh zattardy óz erkimen tapsyrǵan adamdar, eger olardyń áreketterinde ózge qylmystar bolmasa, jaýapkershilikten bosatylady.

Osyǵan baılanysty ІІM azamattardy zańsyz saqtalǵan qarýdy, oq-dárilerdi, jarylǵysh zattardy jáne arnaıy quraldardy óz erkimen tapsyrýǵa shaqyrady», - dedi Nurdildá Oraz.