Qazaqstandyqtar jan basyna shaqqandaǵy tabystyń 1 paıyzyn uıaly baılanysqa jumsaıdy
«International Telecommunication Union (ITU) málimetinshe, Ortalyq Azııanyń basqa elderimen salystyrǵanda Qazaqstandaǵy mobıldi baılanys eń qoljetimdi sanalady. 2021 jyly qazaqstandyqtardyń uıaly baılanysqa jumsaǵan shyǵynyn tarıf boıynsha eseptegende jan basyna shaqqandaǵy ulttyq tabystyń (JUÓ) 1,04%-yna teń ekeni anyqtaldy. Al ınternet jyldamdyǵy Qazaqstanǵa qaraǵanda baıaý dep esepteletin Qyrǵyzstanda mobıldi baılanys shyǵyny jan basyna shaqqandaǵy jalpy ulttyq tabystyń 3,11%-yna teń bolǵan. Ózbekstanda bul kórsetkish 1,14% bolsa, Túrikmenstanda - 1,17%, Tájikstanda 3,02%», - dep jazylǵan saraptamada.
Bul turǵydan alǵanda Ortalyq Azııa elderiniń uıaly baılanysqa jumsaıtyn shyǵyndary qaraılas, al qazaqstandyqtar eń az shyǵyn jumsaıtyn el bolyp kórinedi.
Degenmen, bul elderdiń jan basyna shaqqandaǵy kiris mólsherinde aıtarlyqtaı aıyrmashylyq bar.
«Dúnıejúzilik banktiń málimetinshe, 2021 jyly qazaqstandyqtardyń jan basyna shaqqandaǵy ulttyq tabysy 8720 dollar bolǵan. Al Qyrǵyzstanda bul kórsetkish 1180 dollar, Ózbekstanda 1960 dollar, Tájikstanda 1150 dollar bolǵan. Túrkimenstandyqtardyń 2021 jylǵy jan basyna shaqqandaǵy kirisi týraly resmı málimet joq», - dep jazady Finprom.kz.
ıAǵnı, qazaqstandyqtardyń tarıf boıynsha uıaly baılanysqa jumsaıtyn shyǵyny - jan basyna shaqqanda 90,6 dollar, ózbekstandyqtardyń shyǵyny - 22,3 dollar, qyrǵyzstandyqtardyki - 36,6 dollar, Tájikstan halqynyń shyǵyny - 34,7 dollar bolady.
«Qazan aıynda Qazaqstanda mobıldi ınternettiń medıandyq jyldamdyǵy 22,41 Mbıt/s-ke deıin ósti. Speedtest Global Index málimetteri boıynsha, Ortalyq Azııadaǵy kórshi elderde mobıldi ınternettiń ortasha jyldamdyǵy Qazaqstandaǵy kórsetkishten edáýir tómen. Qyrǵyzstanda bul kórsetkish 20,92 Mbıt/s, Ózbekstanda 15,22 Mbıt/s, Tájikstanda 8,01 Mbıt/s. Jyldyń 10 aıynda Qyrǵyzstan men Ózbekstanda mobıldi ınternet jyldamdyǵy ósse, Tájikstanda, kerisinshe, tómendedi. Túrikmenstanda qazan aıyndaǵy mobıldi ınternettiń ortasha jyldamdyǵy týraly derekter belgisiz. Biraq mamyr aıyndaǵy sońǵy málimet boıynsha ol 4,98 Mbıt/s bolǵan. Jalpy álem boıynsha mobıldi ınternettiń ortasha jyldamdyǵy bir jyl ishinde 2022 jyldyń qazan aıynda 33,43 Mbıt/s-qa deıin ósti», - dep jazylǵan saraptamada.