Qazaqstandyqtar zeınetaqy jınaqtaryn qalaı paıdalanyp jatyr
«2022 jyldyń 1 jeltoqsanyndaǵy jaǵdaı boıynsha 2021 jyldyń qańtarynan beri BJZQ salymshylardyń (alýshylardyń) turǵyn úı jaǵdaıyn jaqsartý úshin jınaqtalǵan zeınetaqy qarajatyn paıdalaný týraly 1 340 016 ótinishin oryndady. Ýákiletti operator-bankterde ashylǵan qazaqstandyqtardyń arnaıy shottaryna BJZQ shamamen 3,2 trln teńge qarjy aýdardy. Birjolǵy zeınetaqy tólemderiniń ortasha somasy – 2,4 mln teńge. Alaıda, bul kórsetkish ár aımaqta ártúrli ekenin atap ótken jón. Mysaly, Mańǵystaý oblysynyń turǵyndary orta eseppen 3,8 mln teńgeni, Soltústik Qazaqstan oblysynyń turǵyndary 1,2 mln teńgeni paıdalanǵan», - dep málimdeıdi qordyń baspasóz qyzmeti.
Sondaı-aq, oryndalǵan ótinishterdiń basym bóligi Almaty turǵyndaryna tıesili – 17,4%), al Astanada – 14%, Mańǵystaý oblysyda – 10,33%.
Birjolǵy zeınetaqy tólemderin belgilengen merzimde turǵyn úı jaǵdaıyn jaqsartýǵa paıdalanbaǵan qazaqstandyqtar da bar, ýákiletti operatorlardan olardyń jeke zeınetaqy shottaryna shamamen 458,4 mlrd teńge qaıtaryldy.
Zeınetaqy jınaǵyn paıdalanǵandardyń shamamen 35,75%-y turǵyn úı satyp alǵan jáne jeke turǵyn úı salǵan, al shamamen 20%-y jınaǵyn alǵashqy jarnadan bastap qaıta qarjylandyrýǵa jáne tolyq óteýge deıingi ıpotekalyq turǵyn úı qaryzyn paıdalaný maqsatynda jumsaǵan. Ótinishterdiń shamamen 21% odan ári jınaqtaý úshin turǵyn úı qurylys jınaq aqshasyna salymdy tolyqtyrý maqsatynda oryndaldy, osy mánge jaqyn mólsheri (20,88%) turǵyn úı qurylys jınaqtary júıesi boıynsha paıdalanýy úshin berilgen.
Sonymen qatar, BJZQ 314,9 mlrd teńgege emdelýge berilgen 398 875 ótinishti oryndady. Bul rette alýǵa bolatyn ortasha soma – shamamen 0,8 mln teńge. Kóbinese qazaqstandyqtar (ótinishterdiń 96% astamy) ózderiniń jınaqtaryn stomatologııalyq qyzmetterge paıdalanady, tek 2,8%-y oftalmologııalyq qyzmetter alý maqsatynda oryndaldy.
Bul rette salymshylardyń (alýshylardyń) BJZQ-daǵy JZSh-na ýákiletti operatordan belgilengen merzimde paıdalanylmaǵan 32,1 mlrd teńge qaıtaryldy.
Aıta ketsek, ınvestıtsııalyq portfeldi basqarýshylarǵa (IPB) 8,7 mlrd teńge aýdarylyp, BJZQ 5 909 ótinishti oryndady. Biregeı ótinish berýshilerdiń, ıaǵnı óz jınaqtarynyń bir bóligin birneshe basqarýshy kompanııaǵa berýge sheshim qabyldaǵan salymshylardyń jalpy sany – 3 388. Aýdarymnyń ortasha somasy – 1,5 mln teńge.