Qazaqstandyqtar zań jobalaryn talqylaý barysyn onlaın kóre alady - senator

NUR-SULTAN. QazAqparat – Qazaqstandyqtar Senat depýtattarynyń zań jobalaryn talqylaý barysyn tikeleı efırden kóre alady. Bul týrady Qyzylorda oblysynyń turǵyndarymen kezdesý barysynda atalmysh palata depýtaty Murat Baqtııaruly aıtty, dep habarlaıdy QazAqparat.

Parlament Senatynyń baspasóz qyzmetinen málim etkendeı, depýtattar Murat Baqtııaruly men Bekmyrza Elamanov jumys babyndaǵy saparmen Qyzylorda oblysynyń Jalaǵash aýdanyndaǵy Jalaǵash kentinde jáne Buqarbaı batyr aýylynda, sondaı-aq Syrdarııa aýdanyndaǵy Syrdarııa kentinde boldy.

Júzdesýde Senat jumysynyń ashyqtyǵy týraly aıtylyp, palatanyń jalpy otyrystary men komıtetterdiń keńeıtilgen otyrystary tikeleı efırde kórsetiletini aıtyldy.

«Zań jobasyn talqylaý barysyn ǵalamtordan barsha qazaqstandyqtar kóre alady. Ótken jyly «Pedagog mártebesi týraly» jáne halyqtyń densaýlyǵyna qatysty zańdar halyq arasynda keńinen talqylandy. Osyndaı máselelerdi talqylaýda halyqtyń pikiri, usynysy biz úshin mańyzdy. «Pedagog mártebesi týraly» zań ustazdardyń sapaly bilim berýi jáne olardy artyq júktemeden aryltý úshin qabyldanyp otyr. Muǵalimderdiń ar-namysyna tıiskenderge qatysty jaýapkershilik kúsheıtilip, tıisti mólsherde aıyppul tóleıtin bolady. Ustazdar qaýymyn áleýmettik jaǵynan qamtamasyz etý de qolǵa alynyp otyr», - dedi Murat Baqtııaruly.

Odan basqa, elimizde jol-kólik oqıǵalarynyń jıilep ketýine baılanysty birqatar zańdarǵa ózgerister engizildi. Atap aıtqanda, kólikti mas kúıinde basqarǵan azamattar 10 jylǵa deıin kólik júrgizý quqyǵynan aıyrylýy múmkin.

Depýtattar aımaqty aralaý barysynda I.Toqtybaev atyndaǵy №35 mektep-lıtseıge arnaıy baryp, aýyl turǵyndarymen, muǵalimdermen, medıtsına qyzmetkerlerimen, aýdandyq jáne oblystyq máslıhat depýtattarymen, sharýa qojalyqtarynyń ókilderimen, sondaı-aq aýyl aqsaqaldarymen kezdesti.

Senatorlar sonymen birge turmystyq jáne kámeletke tolmaǵandarǵa qatysty zorlyq-zombylyq, nashaqorlyq, adam ólimine qatysty qylmystar úshin jaýapkershilikti kúsheıtý sharalary týraly aıtty. Júzdesýde aýyl turǵyndarynyń usynys-pikirleri tyńdaldy. Turǵyndar «Pedagog mártebesi týraly» zań jobasynyń qabyldanǵanyna rızashylyǵyn bildirip, mindetti áleýmettik medıtsınalyq saqtandyrý, zeınetaqy jáne eńbekaqyǵa qatysty saýaldar qoıdy.

Palata ókilderi kezdesýde aıtylǵan ózekti máseleler baqylaýda bolatynyn aıtyp, mańyzdy taqyryptar Parlament Senatynda talqylanatynyn jetkizdi.