Qazaqstandyqtar ulttyq mýzykalyq aspaptardy tegin úırene alady

NUR-SULTAN. QazAqparat – Búgin elordada bir top mádenıet jáne óner salasynyń qyzmetkeri koronavırýsqa qarsy qaıta vaktsına salǵyzdy. Osy tusta óner mamandary qalyń jurt vaktsına alyp, mádenıet mekemeleri qyzmetiniń qaıta jandanǵanyn qalaıdy, dep habarlaıdy QazAqparat tilshisi.

«Búginde kitaphanalar oqyrmansyz jumys istep jatyr. Sol sııaqty teatr jumysy da onlaın formatqa aýysty. Osy oraıda tanymal óner qaıratkerleriniń qatysýymen teatr óneri taqyrybyna arnalǵan onlaın dáris ótkizýdi josparlap otyrmyz. Onlaın kezdesý Zoom platformasy arqyly ótedi. Keıin onyń vıdeosy YouTube jelisine júktelip, kez kelgen adam kóre alady. Onlaın dáris aqpan aıynda bastalady. Sondaı-aq dombyra, jetigen jáne basqa da mýzykalyq aspaptardy úırenem degen jandar úshin E.Rahmadıev atyndaǵy akademııalyq fılarmonııasynyń qyzmetkerleri Zoom arqyly tegin úıretý sabaqtaryn ótkizbek», - dedi Nur-Sultan qalasy Mádenıet basqarmasynyń basshysy Sanat Shapashov tilshilerdiń suraǵyna jaýap bere otyryp.

Odan bólek, basqarma basshysy karantın talaptary jeńildegen ýaqytta shyǵarmashylyqpen stýdııada aınalysýǵa bolatyndyǵyn alǵa tartty.

«Koronavırýsqa qarsy vaktsına alý kerektigi álemde moıyndalyp otyr. Sonymen qosa revaktsınatsııa qarqyndy júrip jatyr. Biz mádenıet nysandarynyń qalypqa saı jumys jasaǵanyn qalaımyz. Kórermender teatr men kontsertke emin-erkin kelse deımiz. Bizdiń mamandar karantınniń aıaqtalýyn asyǵa kútýde. Sondyqtan biz óner adamdary barshany vaktsına jáne qaıta vaktsına alýǵa shaqyramyz», - deıdi ol.

Onyń aıtýynsha, elordada 2 myńǵa jýyq mádenıet jáne óner salasy qyzmetkeriniń 1700-i indetke qarsy vaktsına aldy. Qalǵanynda ekpe alýǵa medıtsınalyq qarsy kórsetilimder bar.

Aıta ketsek, búgin Nur-Sultan qalasynda mádenıet jáne óner qyzmetkerleri revaktsınatsııa jasatty.