Qazaqstandyqtar Túrkııa halqyna jınaǵan aqsha kólemi 3,6 mln dollardan asty

ASTANA. QazAqparat – Qazaqstandyqtar Túrkııadaǵy joıqyn zilzaladan zardap shekkenderge 3,6 mln dollardan astam qarajat jınap berdi, dep habarlaıdy QazAqparat túrik eliniń Qazaqstandaǵy Elshiligine silteme jasap.

«Jer silkinisinen zardap shekkenderge arnalǵan kómek shotyna búgin Qazaqstanda jınalǵan 216 myń AQSh dollary AFAD-tyń (Túrkııanyń tótenshe jaǵdaılar basqarmasy – red.) resmı shotyna aýdaryldy. Osylaısha, qaıyrymdylyqtyń jalpy kólemi 3 mln 616 myń AQSh dollaryn qurady», - delingen Túrkııa Elshiliginiń málimetinde.

Buǵan deıin Elshilik: «Qazaq baýyrlarymyz qaıyrymdylyq retinde bergen 84 ulttyq qazaq úıi jer silkinisinen zardap shekkenderge kómek retinde apat ornyna jetkizildi», - dep jazǵan edi. QazAqparat tilshisi Túrkııadan habarlaǵandaı, kıiz úılermen qosa, Qazaqstan jibergen gýmanıtarlyq júkter de bar.

Eske salaıyq, Prezıdent Qasym-Jomart Toqaevtyń tapsyrmasymen Túrkııa Respýblıkasyna gýmanıtarlyq kómek retinde 1 mln dollar bólingen edi. 15 aqpan kúni belgili bolǵandaı, Úkimet atalǵan elge qosymsha 55 tonnaǵa jýyq gýmanıtarlyq júk jiberetin boldy.

Búginge deıin qazaqstandyq qutqarýshylar úıindiler astynan 7 adamdy qutqaryp, 88 adamnyń máıitin alyp shyqty.

Sońǵy málimetke sáıkes, 6 aqpan kúni bolǵan zilzaladan kóz jumǵandar sany 35 myńnan asty.