Qazaqstandyqtar TMD elderi arasynda ótken Áskerı-sport oıyndarynda úshinshi oryndy enshilendi
Qazaqstan armııasynyń qurama komandasy jarysta úshinshi oryndy ıelendi. Bizdiń áskerıler barlyǵy 47 medal - 7 altyn, 16 kúmis jáne 24 qola jeńip alyp, Qyrǵyzstan, Tájikstan jáne Armenııa elderiniń sportshylaryn artta qaldyrdy Alǵashqy áskerı-sport oıyndarynda Qazaqstannyń atynan QR QM Armııanyń ortalyq sport klýbynyń ataqty áskerı sportshylary shyqty. Sýda júzý, dzıýdo, qoıan-qoltyq kúres, kir sporty, ofıtserlik úshsaıys jáne shtattyq qarýdan oq atý boıynsha saıysqa túsken bizdiń sarbazdar júldeli oryndardy jeńip aldy.
Jarysqa alty elden barlyǵy 300-den astam áskerı qyzmetshi qatysty. Birinshi oryndy reseıdiń atletteri, al ekinshi oryndy - Belorýssııa armııasynyń quramasy jeńip aldy. Erteń, 1 tamyz kúni Halyqaralyq armııalyq oıyndar bastalatynyn aıta ketken jón. Qazaqstan osy aýqymdy shara aıasynda úsh túrli saıysqa qatysady. Atap aıtqanda, olar «Tank bıatlony», «Avıadarts» jáne «Kaspıı teńizi» (teńiz bıatlony). Sondaı-aq 1-15 tamyz aralyǵynda bizdiń 20 tankishi Máskeý oblysyna qarasty «Alabıno» polıgonynda ótetin 13 memleket ókilderimen birge sheberlikterin synaıdy. Dál osy ýaqytta Rıazan, Syzran jáne Lıpetsk qalalarynyń áýeaılaqtarynda Mıg-29, Sý-25, Sý-27 jáne Mı-8 qazaqstandyq ushý ekıpajdarynyń qatysýymen «Avıadarts» óristetiledi. Al Reseıdiń Kaspııdegi akvatorııalarynda bul sátte «Saryarqa» jáne «Oral» zymyrandy-artıllerııalyq kemelerinde QR QK Áskerı-teńiz kúshteriniń áskerı teńizshileri jáne «Batys» óńirlik qolbasshylyǵynyń teńiz jaıaý áskerlerinen quralǵan brıgadasy teńiz bıatlonynyń júldeli oryndary úshin saıysqa túsetin bolady.