Qazaqstandyqtar tikeleı kórsetilimniń arqasynda armııa oıyndaryn tamashalaı alady - QR QM

ASTANA. QazAqparat - Qazaqstandaǵy Armııa halyqaralyq oıyndarynyń resmı ashylý rásiminde bolý, saıys barysyn baqylaý, aldaǵy baıqaýlardyń eń kóz tartar jáne qyzyqty sátterin kórý - munyń barlyǵyn tikeleı kórsetilimniń arqasynda kórýge bolady.

Barsha ArMI-2016 saıysyn kóremin deýshiler úshin Qazaqstan Respýblıkasy Qorǵanys mınıstrliginiń mod.gov.kz. resmı saıtynyń «ARMI OIYNDARY-2016» bóliminde onlaın kórsetilim uıymdastyrylatyn bolady. Sondaı-aq, oıyndar kún saıyn otandyq «KAZsport» telearnasynda kórsetiledi. Erteń Qazaqstanda Armııa halyqaralyq oıyndary - 2016 dodasy bastaý alatynyn esterińizge sala keteıik.

Elimizdiń aýmaǵynda ArMI baǵdarlamasynyń eki baıqaýy ótedi. Ol: «Artıllerııalyq oq atý sheberleri» jáne «Mergen shebi». Tamyzdyń 2-i men 9-y aralyǵynda «Gvardeısk» polıgony álemniń túkpir-túkpirinen jınalǵan úzdik mergender men artıllerııashylardyń iri saıysy óristetiletin orynǵa aınalady.

Jarysqa 12 elden, ıaǵnı, Qazaqstan, Armenııa, Belarýs, Venesýela, Zımbabve, Úndistan, Iran, Qyrǵyzstan, Qytaı, Mońǵolııa, Reseı jáne Grekııadan 270-ten astam áskerı qyzmetshi qatysady, dep habarlaıdy QR QM baspasóz qyzmeti.