Qazaqstandyqtar sońǵy alty jylda 4,6 tonna altyn quıma satyp alǵan

ASTANA. QazAqparat - 2023 jyldyń shilde aıynda ekinshi deńgeıli bankter men banktik emes jekelegen aıyrbastaý pýnkterinde jalpy salmaǵy 111,1 keli 2 787 altyn quıma satyldy, dep habarlaıdy QazAqparat Ulttyn bankke silteme jasap.

Halyqqa tazartylǵan altyn quıma satý jáne satyp alý baǵdarlamasyn Ulttyq bank 2017 jyly iske qosqan bolatyn.

Baǵdarlama qolǵa alynǵaly jalpy salmaǵy 4,6 tonna 135 183 altyn quıma satyldy.

Altyn quımalar bes túrli salmaqta usynylady: 5, 10, 20, 50 jáne 100 g.

Satyp alýshylar arasynda joǵary suranysqa ıe túri – 10 gramdyq altyn quıma. Jalpy satylǵan quımalar arasynda onyń úlesi 26% – 35 125 dana.

Odan keıin 5 gramdyq altyn quıma – 30 738 dana (23%), 100 gramdyq quıma – 28 389 dana (21%), 20 gramdyq quıma - 24 686 dana (18%), jáne 50 grammdyq quıma – 16 245 dana (12%).

2023 jyldyń shilde aıynda altyn quıma kóp satylǵan óńirler: Almaty (1 275 dana, 46%), Shymkent (756 dana, 27%) jáne Astana (151 dana, 5%).

Altyn quımalar senimdi ınvestıtsııa quraly bola alady. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol mezette tóleı otyryp, quımalardy keri satyp ala alady.

Baǵdarlama iske qosylǵaly ekinshi deńgeıli bankter men banktik emes jekelegen aıyrbastaý pýnkteri jalpy salmaǵy 623,0 keli 23 710 altyn quımany keri satyp alǵan.

Bul – jalpy satylǵan quımalardyń 18%.

Keri satyp alynǵan altyn quımanyń barlyǵy halyqqa Ulttyq banktiń fılıaldary arqyly satylady.

Qazir altyn quımalardy Halyk Bank, Eýrazııalyq Bank, Jusan Bank, TsentrKredıt Banki men banktik emes jekelegen aıyrbastaý pýnkterinen satyp alyp, keri satýǵa bolady.