Qazaqstandyqtar Soltústik Makedonııaǵa vızasyz qatynýy múmkin

ASTANA. QazAqparat – Qazaqstan men Soltústik Makedonııa arasynda vızasyz rejım engizý jaǵy qarastyryldy. Bul týraly QR Premer-Mınıstriniń orynbasary – Syrtqy ister mınıstri Murat Nurtileý málim etti, dep habarlaıdy QazAqparat tilshisi.

«Qazaqstan men Soltústik Makedonııanyń teńizge tikeleı shyǵatyn joly bolmaǵandyqtan, qos memleket úshin saýda marshrýttaryn damytý asa mańyzdy. Azamattarymyz úshin vızasyz rejım engizý múmkindigi de talqylandy. Bizdiń oıymyzsha, mundaı qadam kóptegen salalardaǵy qarym-qatynastardyń turaqty damýyna qajetti negiz qalar edi», - dedi Murat Nurtileý elordada Soltústik Makedonııa Syrtqy ister mınıstri, Eýropadaǵy qaýipsizdik jáne yntymaqtastyq uıymynyń tóraǵasymen kezdesý barysynda.

Mınıstrdiń málimdeýinshe, Qazaqstan Soltústik Makedonııamen zamanaýı tehnologııalar, energetıka, aýyl sharýashylyǵy, taý-ken, jáne týrızm sııaqty perspektıvaly salalar boıynsha birlesip jumys isteýge daıyn.

«Іskerlik baılanystardyń damý qarqynyn saqtaý maqsatynda saýda-ekonomıkalyq yntymaqtastyq jónindegi úkimetaralyq komıssııanyń múmkindikterin belsendi paıdalanýǵa kelistik», - deıdi vedomstvo basshysy.

Aıta keteıik, búgin Astanaǵa Soltústik Makedonııa Syrtqy ister mınıstri – Eýropadaǵy qaýipsizdik jáne yntymaqtastyq uıymynyń is basyndaǵy tóraǵasy Býıar Osmanı resmı saparmen keldi.