Qazaqstandyqtar sapasyz taýardy aıyrbastaý, qaıtarýǵa qatysty jıi shaǵymdanady

NUR-SULTAN. QazAqparat – Otandyq tutynýshylardan sapasyz taýardy aıyrbastaý nemese aqshasyn keri alýǵa qatysty shaǵymdar jıi túsedi. Bul týraly QR Saýda jáne ıntegratsııa mınıstrligi Tutynýshylardyń quqyqtaryn qorǵaý komıteti tóraǵasynyń orynbasary Serik Qusaıynov málim etti, dep habarlaıdy QazAqparat tilshisi.

«Bıylǵy 5 aıda Tutynýshylardyń quqyǵyn qorǵaý komıtetine kelip túsken shaǵymdarǵa taldaý jasaı kele, salaǵa qatysty problemany birneshe baǵytqa bólýge bolady. Eń aldymen, másele bólshek saýdaǵa qatysty. ıAǵnı, sapasyz taýardy aıyrbastaý nemese qaıtaryp, aqshasyn keri alýmen baılanysty. Bıyl 5 aıdyń ishinde bólshek saýdaǵa qatysty 4577 ótinish nemese shaǵym kelip túsken. Bul jalpy shaǵym úlesiniń 49,3% quraıdy jáne ótken jylmen salystyrǵanda shamamen 1,5% artyp otyr», - dedi Serik Qusaıynov Egov.kz portalynda ótken ınternet konferentsııada tutynýshylardyń suraǵyna jaýap bere otyryp.

Komıtet basshysynyń málimetinshe, halyqtan kelip túsetin shaǵymdardyń taǵy bir legi turmystyq qyzmetterge qatysty.

«Bıylǵy 5 aıda tutynýshylardan turmystyq qyzmetterge qatysty 1935 ótinish nemese shaǵym kelip túsken. Bul jalpy úlestiń 21% quraıdy. Salaǵa qatysty shaǵymdar sapasyz jáne ýaqtyly qyzmet kórsetpeý baǵytynda. Osy sanattaǵy aryzdar jıhaz jasaýshylar men páterlerdi jóndeý qyzmetine de qatysty», - deıdi ol.