Qazaqstandyqtar salyq beresheginiń bary týraly qaıdan bile alady

ASTANA. QazAqparat - QR Qarjy mınıstrligi memlekettik kirister komıtetinde azamattardyń ózderinde salyq beresheginiń bar-joǵyn qalaı anyqtaýǵa bolatyny túsindirildi, dep habarlaıdy QazAqparat tilshisi.

«Salyq kodeksiniń normalaryna sáıkes, memlekettik kirister organdary jeke tulǵalardyń múlkiniń, jer salyǵynyń, jeke tulǵalardyń kólik quralynyń salyqtyq mindettemeleriniń eseptelgen somasy týraly málimetti jeke tulǵalarǵa salyq organynyń ınternet-resýrsy arqyly taratady. Sonymen birge, kommýnaldyq qyzmetti usynýshylardyń esebine arnalǵan qujat, salyq tóleýshiniń elektrondy poshtasy nemese salyq tóleýshi bergen uıaly telefon nómirine habarlamalyq mátin arqyly da salyq bereshegi týraly málimetti bilýge bolady», - delingen redaktsııanyń saýal hatyna komıtettiń berilgen jaýabynda.

Bul úshin salyq tóleýshi memlekettik kirister organyna jazbasha túrde elektrondy poshtasyn, uıaly telefonynyń nómirin qaldyrady.

Sonymen qatar, salyq tóleýshige memlekettik kirister organymen belgilengen salyqtyń somasy týraly habarlama joldanady. Habarlama alynǵan kezde salyq tóleýshiniń qoly qoıylyp, onyń habarlamany alǵany osylaı rastalady.

«Sondaı-aq, salyq tóleýshilerdiń bereshegi bary týraly aqparattandyrýmen  qamtamasyz etý maqsatynda komıtettiń www.kgd.gov.kz ınternet-resýrsy men «Elektrondy úkimet» portalynda «Salyq beresheginiń bary joǵy (nemese bary) týraly málimet» elektrondy servısi jumysyn bastaǵan. Ol servıs JSN/BSN arqyly salyq beresheginiń bary nemese joǵy týraly málimetti kórsete alady», - delingen komıtettiń jaýabynda.