Qazaqstandyqtar Reseıdiń bes qalasynda daýys berdi

MÁSKEÝ. QazAqparat - Qazaqstan Respýblıkasynyń Reseı Federatsııasyndaǵy Elshisi Imanǵalı Tasmaǵambetov kezekten tys Prezıdent saılaýynda daýys berdi, dep habarlaıdy «QazAqparat» HAA QR SІM baspasóz qyzmetine silteme jasap.

Jeksenbi kúni Imanǵalı Tasmaǵambetov Máskeýde Qazaqstan Respýblıkasynyń Reseı Federatsııasyndaǵy Elshiliginiń janyndaǵy №265 saılaý ýchaskesinde daýys berdi.

Aıta keteıik, Máskeýdegi saılaý ýchaskesinen tys, Qazaqstannyń Reseı aýmaǵyndaǵy dıplomatııalyq ókildikteriniń janynda taǵy tórt saılaý ýchaskesi jumys istep tur. Olar: Sankt-Peterbýrg (№290 saılaý ýchaskesi), Astrahan (№291), Omby (№292) jáne Qazan (№301) qalalarynda.

QR Ortalyq saılaý komıssııasynyń aqparatyna súıensek, RF aýmaǵynda 1 600-den astam qazaqstandyq daýys berýi múmkin.