Qazaqstandyqtar Reseıden kelgenderge qalaı kómek kórsetip jatyr
« Qamqorlyq kórsetýimiz kerek»
Túrkistan oblysyna jumys saparmen barǵan Qasym-Jomart Toqaev Reseıden Qazaqstanǵa kelgen azamattarǵa qamorlyq kórsetýge shaqyrdy.
«Eń bastysy, irgeles eldermen tatý bolýymyz kerek. Budan esh utylmaımyz. Sońǵy kúnderi kórshi elden, ıaǵnı Reseıden kóptegen adam kele bastady. Kópshiligi qazirgi ahýalǵa baılanysty amaldyń joqtyǵynan kelip jatyr. Olarǵa qamqorlyq kórsetip, qaýipsizdigine mán berýimiz qajet. Bul – saıası jáne gýmanıtarlyq másele. Osy máseleni men Úkimetke tapsyrdym», - dedi Memleket basshysy.
El Prezıdenti óz sózinde kúrdeli jaǵdaıda, eń aldymen adamgershilik, sabyrlyq, uıymshyldyqty tanytý qajettigin jetkizdi. Sondaı-aq, ol syrttan kelgen adamdarǵa kómek kórsetiletinin, alaıda jeńildikter berilmeıtinin eske saldy.
«Jumystyń bári zań boıynsha, kelisimder boıynsha júrgiziledi. Biz Reseı tarapymen kelissózder júrgizip, bul túıtkildi elimizdiń múddesine saı sheshemiz. Taǵy da qaıtalap aıtamyn, osyndaı almaǵaıyp kezeńde bizge, eń aldymen, bereke-birlik qajet. Eldiń tynyshtyǵyn saqtaı bilsek, turaqty damı alamyz», – dedi Prezıdent.
Al 26 qyrkúıek kúni Premer-mınıstr Álıhan Smaıylov kóshi-qon máseleleri jóninde keńes ótkizdi. Onda Reseı Federatsııasynan kelýshiler sanynyń artýyna qatysty qalyptasyp otyrǵan ahýal talqylandy. Ol óńirlerde áleýmettik shıeleniske jol bermeý úshin ortalyq jáne jergilikti memlekettik organdardyń is-qımylyn úılestirýdi kúsheıtý qajettigin atap ótti. Sondaı-aq Premer-mınıstr ýaqytsha kelgen shetel azamattaryn jumysqa ornalastyrý kezinde eńbek zańnamasynyń saqtalýyn baqylaýdy kúsheıtýdi tapsyrdy.
«Eldegi quqyqtyq tártip pen qaýipsizdikti qamtamasyz etý jónindegi jumysty kúsheıtý, sondaı-aq kelip jatqan reseılikterge járdem kórsetý kerek: EAEO zańnamasyna sáıkes olardy ýaqytyly tirkep, eńbekpen qamtý máselelerin qarastyrý qajet. Bul oraıda jalǵa beriletin turǵyn úı naryǵyndaǵy ahýaldy turaqtandyrý boıynsha sharalar qabyldaý mańyzdy»,- dedi Álıhan Smaıylov.
Reseı azamattaryna JSN nómirin alý jeńildetildi
Tsıfrlandyrý mınıstri Baǵdat Mýsın Halyqqa qyzmet kórsetý ortalyǵyna baryp, Reseı Federatsııasynan kelgen azamattar legi shynymen kóp ekenin, operatorlardyń aldynda uzyn-sonar kezekte turǵandardyń sanynda esep joq ekenin aıtty. Sondaı-aq ol reseılikterge JSN nómeri SMS-habarlama arqyly jiberiletinin jetkizdi.
«Endi JSN alýǵa ótinish bergen adamdarǵa ekinshi ret kelýdiń qajeti joq, JSN olardyń telefon nómirine 1414 qyzmetinen SMS-habarlama túrinde jiberiletin bolady. Bul daıyn JSN alý úshin kezekte turǵan barlyq HQKO klıentterine qatysty. Bul óz kezeginde adamdardyń halyqqa qyzmet kórsetý ortalyqtarynda shoǵyrlanbaýynyń aldyn alady», - dep túsindirdi Mýsın.
Reseılikter Qazaqstanda qansha ýaqyt tura alady?
Qazaqstanda shetel azamattarynyń júrýine qatysty belgilengen shekteýler bar. Sheteldikterdiń Qazaqstanǵa kelý erejesi «Halyqtyń kóshi-qony týraly» zańy jáne Úkimettiń «Kóship kelýshilerdiń Qazaqstanǵa kelýiniń jáne bolýynyń, sondaı-aq, olardyń Qazaqstannan ketýiniń qaǵıdalaryn jáne kóshi-qon baqylaýyn júzege asyrý qaǵıdalaryn bekitý týraly» qaýlysy arqyly retteledi. Osy erejelerge sáıkes, elde 30 kúnge deıin bolatyn sheteldikterge ýaqytsha tirkeý mindetti emes. Zańǵa sáıkes olar bizdiń elde vızasyz 30 kún júre alady. Odan artyq qalǵysy kelse, mıgratsııalyq qyzmetke tirkelýi tıis. Osylaısha, taǵy 60 kúnge sozdyrýǵa quqyly.
Óńirlerde reseılikterge qandaı kómek kórsetilip jatyr?
Oraldaǵy kınoteatr dırektory baspana tappaı júrgen reseılikterdi kınoteatr zalynda túneýge shaqyrdy. Bul týraly ol kınoteatrdyń resmı Instagram-paraqshasynda jarııalaǵan.
(sýretter ashyq derekkózden alyndy)
«Qala kóshelerinen baspana izdegen Reseı Federatsııasynyń azamattaryn kórip júrmiz, bizge kelińizder. Uıalmańyzdar! Sizderdi kınoteatrdyń ákimshisi kútip alady. Biz zaldy bosatyp beremiz. Biz bárin de túsinemiz»,- dedi kınoteatr dırektory.
Sondaı-aq áleýmettik jelilerde jarııalanǵan aqparat foto, vıdeolarǵa sáıkes, Oral qalasynyń turǵyndary kelgen reseılikterdi qushaq jaıa qarsy alyp jatyr. Olar qonaqtarǵa tegin baspana usynyp, azyq-túlikpen qamtamasyz etken. Sonymen qatar vokzaldan shyǵa beriste de tegin sý qoıylǵan. Instagram jelisine salynǵan vıdeo halyqtyń alǵys bildirgen hattaryna toly.
Sonymen qatar oraldyq eriktiler ákimdikke maýsym aıaqtalǵan balalar lagerin ashý týraly usynyspen shyqqan. Jergilikti basylymnyń habarlaýynsha, qazir keıbir reseılikter Oraldaǵy balalar lagerine ornalastyrylǵan. Aıta keteıik, lagerde táýligine turý quny – 2 myń teńge. Lagerde kóshi-qon polıtsııasy men ákimdik ókilderi, tártip saqshylary kezekshilik etedi.
Oralda Reseıden kelgen dárigerler jumysqa qabyldandy
Reseıdegi mobılızatsııaǵa baılanysty Qazaqstan aýmaǵyna jappaı kelip jatqan azamattardyń arasynda bilikti mamandar da bar. Máselen, Batys Qazaqstan oblystyq juqpaly aýrýlar aýrýhanasy reseılik úsh dárigerdi jumysqa aldy. Aýrýhana bas dárigeriniń aıtýynsha, endoskopıst, ınfektsıonıst jáne bakterıolog mamandar qazir jumysqa kiriskeli jatyr. Olar Qazaqstanda uzaq merzimge qalýdy josparlap otyrǵan kórinedi. Qazirgi tańda óńirde medqyzmetkerler tapshylyǵy aıtarlyqtaı sezilýde. Atap aıtqanda, 270 dáriger jetispeıdi. Suranysqa ıe mamandar: anestezıolog-reanımatolog, akýsher-gınekolog, hırýrg.
«Reseıden kelgen dárigerlerdiń eńbek ótili - 8, 12, 15 jyl. Olar tájirıbeli mamandar. Bizdiń dárigerlermen tájirıbe almasady», - deıdi oblystyq juqpaly aýrýlar aýrýhanasynyń dırektory Nadııa Ahmetova.
Petropavl men Atyraýda Reseıden kelgenderge tegin baspana usyndy
Petropavlda páter tapshylyǵy baıqalyp, jalǵa alatyn baspana qalmaǵan. Osy oraıda reseılikterge keıbir turǵyndar tegin baspana bergen.
Áleýmettik jelide «Atyraý. Reseı azamattaryna kómek» aktsııasynda 7 myńǵa jýyq qatysýshy bar. Jergilikti baspasózdiń jazýynsha, keıbir atyraýlyq turǵyndar meıirimdilik tanytyp, tegin ýaqytsha baspana, azyq-túlik, benzın, júrgizýshi qyzmetterin, dári-dármek, qalany baǵdarlaý, zańgerlik keńester men jumys oryndaryn usynǵan.
Qazirgi tańda áleýmettik jelilerde reseılikterdiń qazaqstandyqtarǵa meıirimdiligi úshin alǵys aıtý trendi júrip jatyr. Osylaısha el azamattary, qonaqjaı, baýyrmashyl, halyq retinde óz kómekterin aıap jatqan joq. Qazir de otandastarymyz ózimizdiń barlyq jaqsy qasıetterimizdi, qazaqqa tán qonaqjaılyqty kórsete otyryp, nemquraılylyq tanytpaı, qıyn jaǵdaıǵa tap bolǵan barsha memleket turǵyndaryna barynsha qolushyn sozyp jatyr.