Qazaqstandyqtar reformanyń órkenıetti jolyn qalaıdy - Rasýl Jumaly

NUR-SULTAN. QazAqparat - Azamattardyń 63 paıyzy daýys berýi, halyqaralyq tájirıbede jaqsy kórsetkish. Jarııalanǵan Exit Poll nátıjesi boıynsha saıasattanýshy Rasýl Jumaly osyndaı pikir bildirdi, dep habarlaıdy QazAqparat.

Saıasattanýshy áleýmettik jelidegi paraqshasynda qazaqstandyqtar reformalardyń órkenıetti jolyn qalaıtynyn atap ótti.

Parlamenttik saılaý óz máresine jetip qaldy. Aldyn ala málimetter boıynsha el aýmaǵynda daýys berýge haqyly azamattardyń 63 paıyzy óz yqtııaryn bildirdi. Halyqaralyq tájirıbede bul óte jaqsy kórsetkish bolyp tabylady. Ásirese pandemııaǵa baılanysty shekteýge, aýa raıynyń qolaısyzdyǵyna, sondaı-aq qordalanǵan kúmán men renishterge qaramastan Qazaqstan azamattarynyń basym bóligi reformalardyń órkenıetti jolyn qalaıtynyn kórsetti», - dedi Rasýl Jumaly.

Saıasattanýshynyń pikirinshe, jarııalanǵan Exit Poll kórsetkishteri resmı esepterden qatty alshaqtamaıdy.

«Saılaý qorytyndysyna keler bolsaq, ázirshe «Qoǵamdyq pikir« ortalyǵy uıymdastyrǵan Exit Poll nátıjelerine sáıkes daýystar úlesi kelesideı ornyqqan: Nur Otan - 71,97, Aqjol - 10,18, Halyqtyq partııa - 9.03, Aýyl - 5,75, Adal - 3,07 paıyz. Árıne, bul tek aldyn ala derekter. Dese de ádette Exit Poll kórsetkishteri resmı esepterden qatty alshaqtamaıtynyn eskerse, saılaý qorytyndysynyń nobaıy qazirdiń ózinde túsinikti sııaqty. Kórip otyrǵanymyzdaı, basym kópshilik daýysty budan buryn boljanǵandaı Nur Otan enshiledi. Elektoraldyq naýqan ájeptáýir teń dárejede júrgizilgeni atalǵan jetistik ákimshilik resýrs emes, negizinen partııa ótken kezeńde, ásirese Covid-19 jaılaǵan 2020 jyly atqarǵan jumysynyń jemisi dep baǵalaýǵa bolady», - dedi Rasýl Jumaly.

Onyń aıtýynsha, birqatar partııanyń konservatıvtik alańdaǵy eki-úsh aılyq belsendiligi uzaq merzimdi keshendi tirlikti almastyra almaıdy.

«Basqa partııalarǵa kelsek Májiliske ótý shegin «Aq jol» men «Halyqtyq partııa» baǵyndyrdy. Bunda da aıtarlyqtaı tosyn jańalyq bolmady. Árıne, «Aýyl» jáne «Adal» partııalary sońǵy ýaqytta óte úlken jumys atqarǵanyn moıyndaý kerek. Dese de saıasat - asa konservatıvtik alań bolǵan soń eki-úsh aılyq belsendilik uzaq merzimdi keshendi tirlikti almastyra almasyna taǵy bir márte kóz jetkizdik. Bul da oppozıtsııa baǵytynda júrgen toptarǵa sabaq bolǵany jón. Túıinin aıtqanda, menińshe, saılaý keremetteı bolmasa da, demokratııalyq talaptarǵa bir taban jaqyn ahýalda ótti. Al endi saılaý atty synaqtan ekiniń biri súrinip, tipti qulap jatqanda, Qazaqstan upaıyn joǵaltpaı tájirıbe jınaqtap tolyǵyp shyqqany qanaǵat tutarlyq sharýa», - dedi saıasattanýshy.