Qazaqstandyqtar ózderine qatysty qupııa tergeý amaldaryna shaǵym túsire alady
Bul týraly búgin Býrabaıda ótken «Qazaqstandaǵy qylmystyq protsess: jańǵyrý joldary» konferentsııasynda QR Bas prokýrorynyń orynbasary Marat Ahmetjanov málimdedi.
Eske sala ketsek, QR quqyq qorǵaý qyzmeti negizderin jańǵyrtý týraly jańa zań jobasyna sáıkes, kýálandyrý kepili, úlgilerdi alý jáne qupııa tergeý amaldary jónindegi úsh sanktsııa prokýratýra organdarynan sotqa ótedi.
"Tergeý organdary qupııa tergeý amaldary júrgizilgeni týraly azamattarǵa habar berýge mindetteledi. Ózderin ańdýdy jáne qońyraýlarynyń tyńdalýyn negizsiz dep eseptegen azamattar sotqa júgine alady. Bul óte mańyzdy jańalyq, mundaı quqyqtar bizdiń azamattarda buryn-sońdy bolmaǵan. Jańa zań jobasy arqyly adamnyń konstıtýtsııalyq quqyqtaryn qorǵaýdy arttyrýdamyz", - dedi M.Ahmetjanov QR quqyq qorǵaý qyzmeti negizderin jańǵyrtý týraly jańa zań jobasynyń negizgi erejelerin tanystyrý barysynda.
Sondaı-aq M.Ahmetjanovtyń aıtýynsha, bul ereje qupııa tergeý amaldaryn taǵaıyndaıtyn sot pen tergeý jumystarynyń zańdylyǵyn qadaǵalaıtyn prokýrordyń jaýapkershilikterin arttyra túspek.
"Endi sottar da qupııa tergeý amaldaryn taǵaıyndaýǵa asqan jaýapkershilikpen qaraıtyn bolady. Al barlyq tergeý amaldarynyń zańdy bolýyn qadaǵalaıtyn prokýror qupııa tergeý amaldaryn júrgizýdiń negizdiligin muqııat tekseredi jáne ony toqtatý nemese ózge shara qabyldaý týraly akti engize alady", - deıdi Bas prokýratýra ókili.
Aıta keteıik, qazan aıynda Elbasynyń bastamasymen «Qazaqstan Respýblıkasynyń keıbir zańnamalyq aktilerine quqyqtyq qorǵaý qyzmetiniń protsestik negizderin jańǵyrtý máseleleri boıynsha ózgerister men tolyqtyrýlar engizý týraly» zań jobasy Parlamentke usynylǵan edi. Onda Prezıdent adam quqyqtaryn qorǵaý deńgeıin kóterý, taraptardyń básekelestigin arttyrý, sot baqylaýyn keńeıtý, tergeý rásimderin jeńildetý jáne tergeý organdary, prokýratýra jáne sot arasyndaǵy ókilettikterin naqty bólý sekildi 5 negizgi baǵytty anyqtap berdi.