Qazaqstandyqtar óz qalasynyń ınfraqurylymyn jaqsartý týraly usynys jibere alady
«Qazirgi ýaqytta qala degenimiz jaı ǵana ǵımarattar, aýmaqtar, kósheler ǵana emes, bul – birinshi kezekte adamdar. Qandaı da bir tujyrymdamany josparlaý, ázirleý maqsattary qoıylǵanda adamdar týraly aıtylady. Turǵyndarmen tıimdi kommýnıkatsııa, qoǵamnyń qatysýy jáne azamattardy qalalyq josparlaýǵa tartý – barlyq qalanyń damýyndaǵy tabystyń kepili bolmaq. Kez kelgen qala úshin kez kelgen jobanyń sátti shyǵýynyń 40%-y tıimdi kommýnıkatsııaǵa baılanysty. Ýrbanıstıkada kommýnıkatsııany qalaı júzege asyrý kerektigi týraly myńdaǵan mysal jazylǵan. AQSh-ta qandaı da bir jaqsartý qajettiligi boıynsha vıdeokontent qabyldaıtyn platforma iske asyrylyp jatyr, qala ákimshiligi turaqty túrde qandaı da bir sheshimderdi talqylap, qabyldaıdy», - dedi Q88 ýrbanıster Qaýymdastyǵy keńesiniń tóraǵasy Erlan Áýkenov Ortalyq kommýnıkatsııalar qyzmetinde ótken baspasóz máslıhatynda.
Ýrbanıster qaýymdastyǵynyń basshysy «Berekeli bastaý – qalalyq bastama» alǵashqy jobasynyń iske qosylǵanyn atap ótti.
«Joba onlaın platforma túrinde jumys isteıdi, onda qala turǵyndary ınfraqurylymdy jaqsartý ıdeıalaryn usynady, eń ózekti bastamalarǵa daýys beredi, aldaǵy ýaqytta jergilikti bılik belgili bir jobalardy iske asyrýda basymdyqqa ıe bolady. Jobanyń basty maqsaty – qalanyń basty ózgeristerine turǵyndardy kóptep tartý. Turǵyndar qalany jaqsartý, aǵash otyrǵyzý, saıabaqtardy abattandyrý, sport alańdaryn salý týraly kez kelgen ıdeıany usyna alady. Barlyq ótinimder jınalǵanyp, daýys berý jarııalanǵannan keıin túrli taqyryptar men máseleler boıynsha ıdeıalar bir alańda ornalastyrylady. Budan ári eń kóp daýys alǵan jobalar iske asyrýǵa jiberiledi jáne qandaı da bir qalada basymdyq retinde qoıylady», - dedi Erlan Áýkenov.
Aıta keteıik, jyl basynda Qalalardy sapaly josparlaý Berekeli bastama platformasynda talqylanatyny jarııalanǵan edi. Portalda qalanyń ár turǵyny ınfraqurylymdy jaqsartý boıynsha óz usynystaryn bere alady. Jobalardy mamandar ǵylymı turǵyda qarastyryp, eń úzdikteri daýys berý úshin portalda jarııalanady .