Qazaqstandyqtar otandyq qandaı kólikterdi unatady
«QazAvtoÓnerkásip» Qazaqstannyń avtomobıl salasy kásiporyndarynyń odaǵy bıylǵy 4 aıda avtoóndiris salasynyń jumys nátıjesin jarııa etti.
Atalǵan odaq málimetinshe, qańtar-sáýir aralyǵynda Qazaqstan aýmaǵynda jalpy quny 173,4 mlrd teńge bolatyn 23 703 avtokólik quraly (jeńil jáne júk kóligin, avtobýs tehnıkasyn, arnaıy mashınalar men tirkemelerdi qosa alǵanda) qurastyryldy. Naqty mándegi shyǵarylǵan ónim kólemi ótken jylǵy kórsetkishten 84,6 paıyzǵa asyp tústi.
Jeńil avtomobıl óndirisi 1,7 ese artyp, 20 906 kólikke jetti. Avtobýs tehnıkasyn shyǵarý tórt aıda 73,4 paıyzǵa ósti. Atalǵan kezeńde 352 avtobýs shyǵaryldy. 2 080 júk kóligi qurastyryldy. Ósim 6,8 esege jetip otyr. Sondaı-aq 289 tirkeme, 76 arnaıy mashına jasaldy.
2020 jyldyń sáýir aıynda qazaqstandyq kásiporyndardyń konveıerinen 4 867 avtokólik shyqty. Bul, 2019 jylǵy kórsetkishten 20,4 paıyzǵa joǵary. Degenmen, osy jyldyń naýryzymen salystyrǵanda kórsetkish 21,8 paıyzǵa tómendegeni baıqalady. Naýryzda elimizde 6 229 avtokólik shyǵarylǵan edi.
Respýblıka turǵyndarynyń otandyq avtomobılderdi satyp alýǵa jumsaǵan shyǵystary ótken jyldyń kórsetkishimen salystyrǵanda 30 paıyzǵa artyp, 91,3 mlrd teńgege jetti. «Azııa Avto» AQ tórt aıda - 5 882 , «SaryarqaAvtoÓnerkásip» JShS 5 286 avtomobılin satty. Munan arǵy otandyq avtoóndirýshilerdiń óz ónimderin satýdaǵy reıtıngi mynadaı: «SemAZ» JShS (729), «KAMAZ-Injınırıng» AQ (286), «Hyundai Trans Auto» JShS (99) jáne «Daewoo Bus Kazakhstan» (7).
Qazaqstanda qurastyrylǵan eń ótimdi jeńil kólik brendine Lada (3 685), Hyundai (3 171), KIA (1 952), Ravon (1 369) jáne JAC (193) avtomobıli kiredi. Munan bólek, otandyq kásiporyndar usynatyn brendter qatarynda Chevrolet (175), Skoda (136) jáne UAZ (69) kólikteri bar.
Jeńil kólikterdiń Lada Granta (1 701), Ravon Nexia R3 (1 369), KIA Rio (1 225), Hyundai Tucson (1 113) jáne Lada Vesta (962) markalary kóp satylǵan. Qazaqstandyqtar arasynda tanymal modelder legine Hyundai Creta (698), Hyundai Accent (572), Lada Largus (528), KIA Sportage (427) jáne Hyundai Elantra (424 ) brendteri de kirip otyr.