Qazaqstandyqtar otandyq fılmderge kóbirek bara bastady – statıstıka

ASTANA. QazAqparat – Ótken jyly kınoteatrǵa barýshylar sany 2021 jylmen salystyrǵanda 2 ese ósken, dep habarlaıdy QazAqparat Ulttyq statıstıka bıýrosyna silteme jasap.

2022 jyly kınoseanstarǵa barýshylar sany 17 mln asty, bir jyl ishinde kórsetkish eki eseden astam ósti (2021 j – 6,6 mln). Qazaqstandyqtar Ulttyq fılmder seanstaryna kóbirek bara bastady. 2021 jyly otandyq fılmderdiń kórsetilimderin 931 myń adam kórdi, bul – kınoǵa barǵandardyń jalpy sanynyń 12,1%-y bolsa, 2022 jyly ulttyq kınoǵa barýshylar úlesi – 53,6%.

Otandyq kıno seanstarynyń sany 2021 jylǵy 66 myńnan 2022 jyly 296 myńǵa deıin ósti.

Tolyqmetrajdy fılmderge barǵandardyń basym bóligi AQSh-ta jasalǵan fılmderdi kórgen – 7 mln, odan keıin qazaqstandyq (4,7 mln), reseılik (486,1 myń), brıtandyq (176,1 myń) jáne avstralııalyq (46,5 myń) fılmder tur.

Osy oraıda, kınoseanstardy ótkizetin uıymdardyń kirisi de ósti – 2021 jylǵy 13,5 mlrd teńgeden 2022 jyly 26,8 mlrd teńgege deıin.

Aıta ketsek, 2022 jyly Qazaqstanda 105 kınoteatr jumys istedi, onyń 4-eýi aýyldyq jerde ornalasqan.

Sonymen qatar, Qazaqstanda 67 kınematografııa uıymy bar, olar ótken jyly 331 fılm túsirdi, onyń ishinde tolyqmetrajdy fılm – 49 (2021 jyly – 340 fılm, onyń ishinde tolyqmetrajdysy – 31).

Eske salsaq, jýyrda Úkimet basshysy Mádenıet jáne sport mınıstrligine kınoprokattaǵy otandyq fılmderdiń úlesin kóbeıtýdi tapsyrǵan bolatyn.