Qazaqstandyqtar Nusuk platformasymen Ýmra saparyn rásimdep, Mekke men Medınaǵa tikeleı áýe reısimen qatynaıdy – Mınıstr Taýfık ál-Rábıa
Qajylyq jáne Ýmra mınıstri Taýfık ál-Rábıanyń sózine qaraǵanda, atalǵan jobanyń Qazaqstandy da qamtýy Prezıdent Qasym-Jomart Toqaevtyń osy elge jasaǵan sapary qanshalyqty jemisti bolǵanyn kórsetedi.
«Qazaqstan men Saýd Arabııasynyń arasyndaǵy qarym-qatynas óte qarqyndy damyp keledi. Bizdi joǵary mártebeli Prezıdent myrzanyń eki aı buryn Saýd Arabııasyna jasaǵan sapary qýantty. Bul sapar óte jemisti bolyp, kóptegen kelisimge qol qoıyldy. Keleshekte bul kelisimder eki el qarym-qatynasyna serpin beredi dep oılaımyz. Qazaqstan men Saýd Arabııasynyń arasyndaǵy qarym-qatynastyń tyǵyz ekenin aıta otyryp, men Qajylyq jáne Ýmra mınıstri bolyp taǵaıyndalǵannan keıingi ekinshi saparymdy sizderge jasap otyrǵanymdy atap ótkim keledi. ıAǵnı, bul meniń osy laýazymdaǵy ekinshi saparym bolyp tur.
Sondaı-aq eki eldiń tyǵyz baılanysynyń bir mysaly retinde Qazaqstan azamattarynyń Saýd Arabııasyna saıt arqyly nemese Saýda Arabııasynyń Elshiligine barý arqyly elektrondy vıza alyp, qajylyq jasaı alatynyn keltirýge bolady», - deıdi mınıstr.
Sonymen qatar doktor Taýfık ál-Rábıa eki eldiń arasynda tikeleı áýe reısterin ashý arqyly Nusuk jobasyn qoldanýshy qazaqstandyqtardyń saparyn odan ári jeńildete túsý josparda bar ekenin jetkizdi.
«Bul iste biz Qazaqstan Úkimetimen birge búkil sharalardy qarastyryp jatyrmyz. Fly Nas kompanııasymen kelissóz júrip jatyr. 2023 jyly osy baǵytta jańalyq bolady. Biraq bul biz áýe tasymalynda tek Fly Nas kompanııasymen ǵana áriptestik ornatamyz degen sóz emes. Esigimiz bárine ashyq – Saýd Arabııasynyń kompanııalaryna da, Qazaqstan kompanııalaryna da ashyqpyz. Keleshekte Qazaqstan men Saýd Arabııasynyń qalalary arasynda áýe tasymalyn damytýdy josparlap otyrmyz. Búgin men Qazaqstannyń Indýstrııa jáne ınfraqurylymdyq damý mınıstrimen kezdesý ótkizdim. Sol kezde osy máseleni talqyladyq. Sondaı-aq biz eki eldiń áýe kompanııalarynyń áriptestigin damytý, eki eldiń arasynda tikeleı áýe qatynasyn ornatý máselelerin sóz ettik. Mınıstr myrza bul ıdeıany qoldap, keleshekte mindetti túrde atalǵan máseleni zerdelep, tikeleı áýe qatynasyn engizetinin málim etti», - dedi Saýd Arabııasynyń ókili.
Qajylyq jáne Ýmra mınıstriniń aıtýyna qaraǵanda, pandemııa aldynda Qazaqstan azamattaryna Saýd Arabııasynyń elektrondy vızasyn berý jolǵa qoıyla bastaǵan. Endi atalǵan jobany Nusuk memlekettik platformasynyń aıasynda óristetýdiń múmkindigi týyp otyr.
«Elektrondy vızany birneshe mınýttyń ishinde alýǵa bolady. Keıingi ýaqytta Qazaqstannan keletin týrısterdiń sany artyp otyr. Jyl basynan beri Saýd Arabııasyna sizderdiń elden kelgen qulshylyq etýshilerdiń sany 36 myńǵa jetti. Joǵary mártebeli korol Salman ben Ábdelazız Ál Saýdtyń Úkimeti koroldigimizdiń eki qasıetti qalasy Mekke men Medınaǵa, basqa da qalalarymyzǵa búkil álemnen kelýshilerdi tartýǵa úlken mán beredi. Sondyqtan biz búkil musylmandardy, sondaı-aq Qazaqstannyń barsha azamattaryn óz elimizde kórgimiz keledi.
Nusuk memlekettik platformasyn Ýmra saparyn qalaı oryndaýǵa bolatynyn sıpattaıtyn oryn deýge bolady. Sondaı-aq jańaǵy aıtyp otyrǵan elektrondy vızany qalaı alýǵa bolatyny, qosymsha qandaı jerlerge saıahat jasaýǵa bolatyny týraly tolyqqandy aqparat tabýǵa bolady. Bul – barsha álem jurtyna arnalǵan platforma. Biraq onyń iske qosylatyny týraly málimet osy jerde tuńǵysh ret jarııalanyp otyr.
Nusuk memlekettik platformasy qazir Ýmra saparyn jasaýǵa jáne Mekke men Medınaǵa saıahat jasaýǵa arnalyp otyr. Al Qajylyq úshin basqa platforma men basqa baǵdarlamalar bar»,- dep túsindirdi doktor Taýfık ál-Rábıa.
Aıta ketý kerek, bul Nusuk platformasy Saýd Arabııasynyń týrızm jónindegi basqarmasymen birlese otyryp, Visit Saudi ekojúıesi sheńberinde qyzmetterdiń tolyq aýqymyn usyný úshin, sonyń ishinde vızalar, ruqsattar, brondaý protsesteri men rásimderin jeńildetý úshin iske qosylǵan. Sonymen qatar Mekke men Medınaǵa keletin musylmandardyń tájirıbesin jaqsartý men baıytý úshin túrli paketter men baǵdarlamalardy usynady.
Sonymen qatar, Nusuk memlekettik platformasynda Saýd arabııasyndaǵy qyzyqty nysandarǵa barýdy sapaly josparlap, kólik izdeý, marshrýt túzý qyzmetterin, ınteraktıvti kartalardy paıdalanýǵa bolady.
Platforma qyzmet kórsetýshi uıymdarǵa da óz qyzmetterin Ýmrada qulshylyq etýshilerge elektrondy túrde usynýǵa múmkindik beredi. Sol arqyly jeke sektorǵa qoldaý kórsetedi. Al qajylyqty josparlaý baǵdarlamasynyń qyzmetteri Nusuk platformasyna tolyqtaı aýystyrylǵanǵa deıin Maqam platformasynda kórsetiledi.