Qazaqstandyqtar nesıe alýdy kóbeıtti - Nesıe bıýrosy

ALMATY. QazAqparat - Almatyda búgin baspasóz máslıhaty barysynda Birinshi nesıe bıýrosynyń bas dırektory Rýslan Omarov nesıe naryǵyndaǵy ózgerister týraly aıtty, dep habarlaıdy QazAqparat tilshisi.

Spıkerdiń aıtýynsha, sońǵy 3 jylda nesıe portfeliniń somasy 5 trln teńgeden asty.

«Nesıe alý boıynsha belsendilik 30 pýnktten asty. Bul nesıe naryǵy jandanǵandyǵyn bildiredi. 2017 jyly Ekinshi deńgeıli bankter arqyly berilgen nesıe kólemi 2016 jylmen salystyrǵanda 40%-ǵa artty. Bankter 2,1 trln teńge kóleminde nesıe berdi. Shaǵyn qarjylyq uıymdardyń da nesıe berý kórsetkishi 71%-ǵa artty», - dedi Rýslan Omarov.

Birinshi nesıe bıýrosynyń málimetine súıensek, Qazaqstanda qazir 5 mln adam nesıe alǵan.

8,8 mln nesıe shartyna qol qoıylǵan.

Tutynýshylardyń 49,7%-y turmystyq maqsatta,  24,8%-y ıpoteka, 18,3%-y kepil qoıý arqyly tutynýshylyq nesıe alǵan.

«Qazaqstandyqtar nesıeni ne úshin alady. Kóbinese nesıe kartalaryn paıdalaný 95%-ǵa ósken. 2017 jyly karta arqyly 80 mlrd teńgeden asa nesıe berilgen. Ekinshi orynda ıpotekalyq nesıe tur. Bul sektor 2016 jylmen salystyrǵanda 57,8%  ósken. 2017 jyly 1,4 trln teńge kóleminde kepilsiz ekspress-nesıe berilgen. Al kepildik nesıe men avtokredıt boıynsha belsendilik baıqalmaıdy», - dedi Rýslan Omarov.