Qazaqstandyqtar memlekettik turǵyn úı qorynan tek bir turǵyn úıdi jekeshelendirýge quqyly
B. Maqulbekov atap ótkendeı, Joǵarǵy Sottyń atalǵan normatıvtik qaýlysy Qazaqstan Respýblıkasynyń memlekettik turǵyn úı qorynan beriletin turǵyn úı-jaılardy azamattardyń jekeshelendirý máseleleri týraly zańnamanyń keıbir normalaryn birkelki túsiný jáne sot tájirıbesinde durys qoldaný maqsatynda ázirlendi.
Joǵarǵy Sottyń atalǵan máselege qatysty qoldanystaǵy normatıvtik qaýlysy 1997 jyldyń 18 shildesinde qabyldanǵan. Joǵaryda atalǵan normatıvtik qaýlyny qabyldaǵannan keıin birqatar zańnamalyq aktiler aıtarlyqtaı ózgeristerge ushyrady.
«Jańa qaýlyda Qazaqstan Respýblıkasynyń azamattary el aýmaǵynda memlekettik turǵyn úı qorynan tek qana bir turǵyn úıdi jekeshelendirýge quqyly ekendigi qarastyrylǵan. Kýpondyq mehanızm arqyly turǵyn úıdi jekeshelendirýge qatysý jáne turǵyn úı-jaıdy negizgi jaldaýshy otbasy múshesiniń buryn jekeshelendirilgen turǵyn úıdegi úlesi elý paıyzdan kem bolýy onyń memlekettik turǵyn úı qorynan turǵyn úıdi jekeshelendirý quqyǵyn keıinnen iske asyrýyna kedergi keltirmeıdi»,-deıdi ol.
Sonymen birge, azamattardyń, eger de: Qazaqstan Respýblıkasy aýmaǵynda menshik ıesi quqyǵynda ózge turǵyn úıi bolsa, bul rette turǵyn úıdegi úlesiniń elý paıyzdan kem bolýy eskerilmeıdi; Qazaqstan Respýblıkasy aýmaǵynda ıpotekalyq turǵyn úı zaımy sharty boıynsha mindettemesi bolsa; jekeshelendirýge júgingen sátke deıin sońǵy bes jyl ishinde olarǵa menshik ıesi quqyǵynda tıesili turǵyn úıdi ıelikten shyǵarsa, memlekettik turǵyn úı qorynan alynǵan turǵyn úıdi jekeshelendire almaıdy.
Jekeshelendirý týraly shartty resimdeý, tek mundaı jeńildikterge ıe adamǵa ǵana jasalady. Mundaı jaǵdaıda jekeshelendiriletin úı-jaı otbasynyń kámeletke tolǵan músheleriniń kelisimimen atalǵan jeńildikti paıdalanatyn adamnyń jáne onyń otbasy músheleriniń ortaq birlesken menshigine aýysady. Mundaı jekeshelendirilgen úı-jaıdyń ıesi jekeshelendirý týraly shartqa engizilmegen adamdardy óz qalaýy boıynsha turǵyn úıden shyǵara almaıdy.