Qazaqstandyqtar Medeý muz aıdynynda Denıs Tenge eskertkish ornatpaq

ALMATY. QazAqparat - Qazaqstandyqtar Medeý muz aıdynynda belgili sportshy, mánerlep syrǵanaýshy Denıs Tenniń eskertkishin ornatpaq. Qazir áleýmettik jelide osy maqsatta kraýndfandıng alańy quryldy, dep habarlaıdy QazAqparat tilshisi.

Mundaı bastamany Almaty turǵyny Azıza Ótegenova Feısbýk jelisinde kóterdi.

«Biz Denıs úshin ne isteı alamyz? Meniń qolymnan kraýndfandıng qoryn ashý ǵana keledi. Denıs Almaty tarıhynda qalýy kerek. Basqasha bolýy múmkin emes. Júregimizdi qaıǵy basty. Jas. Ádemi. Talantty! Ony eske alyp otyratyn, máńgilik jadymyzda qaldyratyn oryn kerek. Ol bul qurmetke laıyq! Biz ony saqtap qala almadyq! Halqymyz bárimiz jabylyp, Denıske Medeýde eskertkish ornataıyq!», - dedi Azıza Ýtegenova.

Onyń bul bastamasyn Medeý muz aıdynynyń basshylyǵy da qoldady.

Búgin kraýnfandıng alańy ashyldy. Qazaqstandyqtar ortaq shotqa erikti túrde qarjy jınaı bastady.

Eske sala keteıik, qaıǵyly oqıǵa Qurmanǵazy men Baıseıitov kósheleriniń qıylysynda túski saǵat 15:00-der shamasynda bolǵan edi.

Sportshy kóliginiń aınasyn urlap bara jatqan eki adamnyń ústinen túsken. Eki arada bastalǵan janjaldyń nátıjesinde álgi adamdar Denıs Tendi pyshaqtap ketken.

Keshe túski 15:00-der shamasynda belgili sportshy Denıs Ten aýrýhanaǵa pyshaq jaraqatymen túsken bolatyn.

Dárigerler klınıkalyq ólimmen túsken sportshyny 2,5 saǵat boıy reanımatsııalyq sharalar jasap, aman alyp qala almady.

Denıs Ten kóp qan joǵaltý sebepti kóz jumdy.